Օրերս «Հետք»-ը անդրադարձել էր գործարար Փայլակ Հայրապետյանի ունեզրկման հարցին: Ըստ հետաքննող լրատվամիջոցի կատարած ուսումնասիրության արդյունքների` գործարարի ունեզրկումն ուղղակի առնչություն ունի Կիպրոսում գրանցված «WLISPERA HOLDINGS LIMITED» օվշորային ընկերության հետ, որի բաժնետերերն են ՀՀ վարչապետ Տիգրան Սարգսյանը, Արարատյան թեմի առաջնորդ Նավասարդ արքեպիսկոպոս Կճոյանը եւ «ադամանդագործ» Աշոտ Սուքիասյանը:
Այս հրապարակման կապակցությամբ ՀՀ վարչապետը հերքում էր տարածել նշելով, որ դիմելու է ՀՀ դատախազություն:Այսօր վարչապետն արդեն դիմել է դատախազություն:
«Թրանսփարենսի Ինթերնեշնլ հակակոռուպցիոն կենտրոն» հ/կ-ն տարբեր ծրագրերի շարքում զբաղվում է նաև բարձրաստիճան պաշտոնյաների ունեցվածքի, նրանց` բիզնես գործունեությամբ զբաղվելու հարցերի քննությամբ:
Aravot.am-ը «Թրանսփարենսի Ինթերնեշնլ հակակոռուպցիոն կենտրոն» հ/կ գործադիր տնօրեն Վարուժան Հոկտանյանից հետաքրքրվեց`այս գործի կապակցությամբ իրենք ի՞նչ դիրքորոշում ունեն. ո՞ւմ են ավելի շատ վստահում՝ ՀՀ վարչապետի՞ն, թե՞ լրատվամիջոցի հրապարակմանը: Նա պատասխանեց. «Վստահության-չվստահության հարց չկա: Ինչպես ես հասկանում եմ, վարչապետը դիմել է այն հիմքով, որ ինչ-որ մեկն իր փոխարեն իր անվան տակ գրանցել է որպես բաժնետեր այդ ընկերությունում: Վարչապետը չի ասում, թե «Հետքը» սուտ է ասում: Հարցն այն է, որ նա չի էլ կարող հերքել, թե այդպիսի փաստաթուղթ կա»:
Կարդացեք նաև
Հետաքրքրվեցինք` Վ. Հոկտանյանը հավատո՞ւմ է, որ առանց Տ. Սարգսյանի գիտության նման բան են արել: Նա պատասխանեց. «Դժվար է հավատալ, բայց մյուս կողմից էլ այսպիսի բաներ հնարավոր է, որ լինեն: Մի քիչ ինձ համար դժվար է ասել` դատախազությունը ինչ կհայտնաբերի: Հիմա «Հետքին» կսկսի տանջել, որ պարզի փաստաթուղթը որտեղից է: Դժվար է ասել, թե այս ամենն ինչքանով օբյեկտիվ կլինի: Կարող է նաև դատախազությունը որոշի ուղղակի ցույց տալ, որ այս ամենը ընդամենը կեղծիք է: Այս պարագայում դժվար թե առանց Տ. Սարգսյանի գիտությամբ է արվել, բայց անմեղության կանխավարկածի հարց էլ կա: Մյուս կողմից էլ՝ դատախազություն դիմելը դեռ չի նշանակում, որ ինքն անմեղ է, առանց իր գիտության են դա արել: Սպասենք, տեսնենք ինչ է ցույց տալու հետաքննությունը»:
Վ. Հոկտանյանը մի շարք հարցեր է բարձրացնում գործի հետ կապված ու մասնավորապես նշում. «Այստեղ առաջին խնդիրը ունեզրկման հարցն է: Իսկ դա կապվում է Սուքիասյանի անվան հետ: Հարց է` իսկ ի՞նչ դերակատարություն է ունեցել այդ հարցում վարչապետը: Ես կոնկրետ փաստեր չգիտեմ, որ վարչապետը դեր ունեցել է այս հարցում, բայց նաև այնպիսի հարցեր են առաջանում` արդյոք այն գումարների շարքում, գրավադրվեցին և գնացին «Ամերիաբանկ», պետբյուջեից միջոցներ գնացե՞լ են այդ հաշվի վրա, թե՝ ոչ: Բնական է, օվշորում հաշիվ ունենալը լավ բան չէ, բայց եկեք նաև սպասենք»:
Տաթև ՀԱՐՈՒԹՅՈՒՆՅԱՆ
Լուսանկարը՝ «Հետքից»
Աշոտ Սուքիասյանի մասին ճշմարտութիւնների եւ Փայլակ Հայրապետյանի կեղծիքի մասին իմանալու համար խնդրեմ այցելէք Ֆէյսբուքում “Աշոտ Սուքիասյանի Ճշմարտութիւնը – Truth about Ashot Sukiasyan” էջը:
Շնորհակալութիւն
Գագիկ Մինասյան