«Ասպիրանտուրան որոշ ուսանողներ սկսել են օգտագործել որպես զինվորական ծառայությունից խուսափելու միջոց ու այդ է պատճառը, որ անցած տարի միայն մեկ աղջիկ է ընդունվել ասպիրանտուրա»,- այսօր խորհրդարանում 2012 թվականի բյուջեի կատարողականի քննարկումների ժամանակ ասաց ՀՀ կրթության եւ գիտության նախարար Արմեն Աշոտյանը՝ պատասխանելով պատգամավորների հարցերին:
Ըստ նախարարի, անցյալ տարի բավականին բացառիկ է եղել քոլեջներում եւ ուսումնարաններում դիմորդների հոսքի առումով, քանի որ վերջին շրջանում, ավանդաբար այդ ուսումնական հաստատություններում թափուր տեղեր են եղել: Անցած տարի որոշ մասնագիտությունների գծով նույնիսկ մրցույթ է եղել:
Արմեն Աշոտյանը նաեւ ասաց, որ անցյալ տարի կրճատվել է պետպատվերով սովորող ուսանողների թիվը, իսկ ուսման վարձը միջինացված թվով կազմել է չորս հարյուր հազար դրամ:
Պատգամավորների առանձնակի ուշադրության առիթ դարձավ դպրոցաշինության թեման: ՀՀԿ-ական պատգամավոր Կարինե Աճեմյանն, օրինակ հետաքրքրվեց, թե ինչու են ահռելի գումարներ ծախսվում հատկապես գյուղական վայրերում գտնվող դեռ խորհրդային տարիներից մնացած հսկայական դպրոցական շենքերի վերանորոգման համար, երբ տվյալ հաստատությունում երկու-երեք դասարան կա միայն: Տիկին Աճեմյանն ասաց, որ ինքը չի ակնարկում այդ շենքերի օտարման մասին ու կողմ է կրթական հաստատությունները իրենց նպատակին ծառայեցնելու, պարզապես, հաճախ հսկայական գումարներ են ծախսվում տվյալ շենքերի վերանորոգման եւ պահպանման խախսերի համար ու, փաստորեն, աննպատակ: ՀՀԿ-ական պատգամավորը հորդորում է առավել խնայողաբար եւ նպատակային կազմակերպել ծախսերը:
Կարդացեք նաև
Նախարար Աշոտյանն ասաց, որ դպրոցաշինության պատասխանատուն իր ղեկավարած գերատեսչությունը չէ, հետեւաբար չի կարող առավել սպառիչ պատասխանել: Հավելեց, որ նման տարածքներն իրենք համաձայնվում են տալ օգտագործման միայն այն կազմակերպություններին, որոնք ուսումնական գործընթաց են իրականացնում:
Առհասարակ, Աշոտյանը կարծիք հայտնեց, որ կրթության ոլորտի պատասխանատուն մեկ գերատեսչություն պիտի լինի: Նա պարզաբանեց, որ տպավորություն չստեղծվի, թե «Աշոտյանը լրացուցիչ լիազորություններ է ուզում»: Պարզապես, ըստ նախարարի, հաճախ, այդ թվում նաեւ դպրոցներում կոռուպցիային վերաբերող հարցերի պարագայում էլ, նախարարությունը լիազորություններ չունի: Լավագույն դեպքում միայն դիմում են պատկան մարմնին, որն էլ ըստ իր հայեցողության է գործում:
Նելլի ԳՐԻԳՈՐՅԱՆ
