Վարդան Սեդրակյանի, Խաչատուր Պողոսյանի եւ Սամվել Հարությունյանի գործով այսօր Կենտրոն եւ Նորք-Մարաշ վարչական շրջանների ընդհանուր իրավասության դատարան էին ներկայացել Պարույր Հայրիկյանի հարեւաններից կառավարությունում աշխատող Սեդա Գեւորգյանը եւ Խաչատուր Ջանազյանը:
Հարեանուհու նախաքննության եւ դատաքննության ցուցմունքների միջեւ հակասություն տեսնելով, դատարանը հրապարակեց դրանք:
Հակասությունը ըստ էության «ստեղծեց» վկան, ասելով, որ ինքը պատշգամբի պատուհանից չի նայել,չնայած, երբ նայեց իր ձեռագիրը, հաստատեց, որ նախաքննության ժամանակ տված ցուցմունքը ինքն է գրել: Նա ասաց, որ մի երեք անգամ իրեն հարցաքննել են:
Այս վկան հայտնեց, որ պայթյունի ձայն է լսել, իրեն թվացել է, թե բակի երեխաներն են:
Երբ լսել է բղավոց, դուրս է վազել առաջին հարկի իր բնակարանից, տեսել է Հայրիկյանին ընկած: Լսել է օգնեցեք, օգնեցեք: Նրա աջ կողմն ամբողջովին արյունոտ էր: Վկան ասաց, որ սառը թրջոց է դրել, որպեսզի չուշաթափվի:
Կարդացեք նաև
Վկա Խաչատուր Ջանազյանը ասաց, որ համակարգչի մոտ է եղել, ապա լսել է թույլ դրմփոց: Վազել է դուրս, եւ տեսել է Պարույր Հայրիկյանին ընկած:
Մի երկար բանավեճի առիթ դարձավ նրան հարցեր տալը. զենք օգտագործել ես երբեւէ, տեսել ես խլացուցիչ, հիշողությունից ոնց եք: Այս վկան ասաց, որ հնարավոր է նախաքննության ժամանակ թարմ ժամանակ ասած լինի, որ կրակոցի թրմփոց է, այն էլ մեկ-երկուսի:
Այս վկան ասաց, որ երբ Պարույր փողկապը թուլացրել են, արյունը հոսում էր:
Էպոսագետ Վարդան Սեդրակյանի պաշտպան Ալեքսանդր Սիրունյանի հարցը հնչեց. «Հայրիկյանը բղավո՞ւմ էր, թե՞ բղավոցով էր մտնում, ի՞նչ էր բղավում», վկան ասաց, որ նա բղավում էր՝ խփեց, օգնեցեք:
Պաշտպանական կողմի մի շարք հարցեր պարզապես ծիծաղի տեղիք են տալիս, դատավոր Գագիկ Պողոսյանը ստիպված է լինում հաճախ դրանք հանել, իսկ հեգնանքով էլ սառը ջուր առաջարկեց պաշտպանական կողմին:
Դատաքննությունը շարունակվում է:
Ռուզան ՄԻՆԱՍՅԱՆ
