Հիդրոէկոլոգիայի եւ ձկնաբանության ինստիտուտի տնօրեն Բարդուխ Գաբրիելյանը այսօր ահազանգեց, որ Սեւանի ավազանի հիմնական գետերն անմխիթար վիճակում են, աղտոտված:
«Չկան մաքրման կայաններ, եւ աղբը լցվում է գետեր: Այդ գետերում նաեւ ոչ կառավարելի ջրառ է իրականացվում ոռոգման եւ էներգետիկ նպատակներով: Դա պետք է անպայման կարգավորվի, բնապահպանական հոսքերը պահպանվեն: Հակառակ դեպքում էկոհամակարգի խախտում է տեղի ուենում, եթե խախտվեց գետի էկոհամակարգը ձկների վերարտադրության մասին խոսելն անիմաստ է»,- այսօր «Ելակետ» ակումբում ասաց պարոն Գաբրիելյանը: Նա մտահոգված է, որ գետեր կան, որոնց ամբողջ ջուրը փոքր ՀԷԿ-ի աշխատանքի համար է օգտագործվում:
Անդրադառնալով խոսաակցություններին, թե մուտանտներ են ներկրվել Հայաստան, ասաց. «Ոչ մի մուտանտ գոյություն չունի Սեւանա լճում: Այդ հարցը բարձրացնողները նպաստում են, որ չբարձրացնեն Սեւանա լճի մակարդակը»:
Նրա խոսքով, վերջին տարիներին իշխան ձկնատեսակի վերականգնման աշխատանքներ են իրականացվում, բայց օրինակ սիգ ձկնատեսակի պահպանման հարցում ոչինչ չի արվում. «Որսագողությունն է ամենակարեւոր գործոնը, որ բերել է սիգի պաշարների խզմանը: Բազմացման տեղի , ջրի որակի խնդիր չկա, կա միայն պահպանության խնդիր: Դրա համար այս ձկնատեսակը տարեցտարի քչանում է»:
Կարդացեք նաև
Անդրադառնալով Ամուլսարի ոսկու հանքի շահագործման խոսակցություններին՝ փորձագետն ասաց, որ հանքը շահագործող ընկերության հետ տարածքում ուսումնասիրություն անելու պայմանագիր ունեն. «Պետք է ուսումնասիրենք տարածքի կենսաբազմազանությունը՝ եւ ջրային եւ ցամաքային: Այսօր կարծիք հայտնելը վաղ է, ուսումնասիրությունները կատարելուց հետո պարզ կլինի՝ հանքի շահագործումն ինչ ազդեցություն կարող է ունենալ կենսաբազմազանության վրա: Իսկ ուսումնասիրությունները կավարտենք մյուս տարի: Տալու ենք օբյեկտիվ նկարագիրը: Թույլ չենք տա մեզ ճնշեն ոչ վերեւից, ոչ էլ՝ ներքեւից»:
Արփինե ՍԻՄՈՆՅԱՆ
