Շաբաթն, ինչպես միշտ, հագեցած էր շոուբիզնեսյան նորություններով: Երեկ՝ մայիսի 31-ին, ժամը 16:00-ին «Star City»-ում տեղի ունեցավ երգիչ Վարդան Բադալյանի ձայնասկավառակի շնորհանդեսը: NEWS.am STYLE-ի թղթակցի հետ զրույցում երգիչը նշել է, որ սա իր երկրորդ ձայնասկավառակն է: Այս մեկը կոչվում է «Տաղ հայտնության»: Ձայնասկավառակում տեղ են գտել հին գուսանական երգեր, որոնցից շատերը մարդկանց արդեն ծանոթ են: Ձայնասկավառակ թողարկելու որոշմամբ Վարդան Բադալյանից հետ չի մնացել նաև երգչուհի Մարգարիտա Բարխոյանը, շուտով նա ևս ձայնասկավառակ կթողարկի: «Ես երբեք չեմ հանգստանում: Միշտ աշխատում եմ եւ նույնիսկ մեկ օր չեմ կարող պատկերացնել առանց սիրելի գործով զբաղվելու: Արդեն մեկ ամիս է, ինչ թողարկվել է իմ նոր հոլովակը: Հիմա աշխատում եմ իմ հեղինակային սկավառակի ուղղությամբ: Բոլոր երգերի հեղինակը ես եմ, քանի որ ինձ համար շատ կարեւոր է հանդիսատեսի առջեւ ներկայանալ իմ կերպարով: Հիմա իմ կյանքում այնպիսի ժամանակաշրջան է, երբ տրվել եմ աշխատանքիս ու երգերիս: Հենց դրանց օգնությամբ էլ կարող եմ իմ ունկնդրին ցույց տալ ներաշխարհս: Շուտով կթողարկվի նաեւ եւս մեկ հոլովակ: Շատ այլ անակնկալներ էլ եմ պատրաստել, որոնց մասին առայժմ չեմ ցանկանում խոսել», – ասել է երգչուհին NEWS.am STYLE-ին: «Դորիանսը» ևս իր երկրպագուներին ուրախացրել է: Այսօր՝ հունիսի 1-ին, ժամը 21:00ին խումբը անվճար համերգ կունենա Կասկադում: Այն կազմակերպվում է Երեխաների պաշտպանության միջազգային օրվան նվիրված Գաֆէսճեան արվեստի կենտրոնի ամենամյա համերգային ծրագրի շրջանակում: «Dorians»-ի մասին խոսելիս, կարծես անհնար է լինում թեկուզ մի քանի նախադասությամբ Եվրատեսիլին չանդրադառնալը: Կրքերը թեժացել են. «Եվրատեսիլ-2013»-ի արդյունքները հնարավոր է վերանայվեն և հաղթանակը շնորհվի Ուկրաինային, այս մասին հայտնել է Inpress.ua-ն, Դանիան՝ մրցույթի գլխավոր մրցանակը նվաճողը, մի քանի օր առաջ հայտնվել է մեծ գլխացավանքի մեջ, և երգի հեղինակներն ու կատարողները մեղադրվում են գրագողության մեջ: Ըստ մասնագետների՝ նրանց երգը անհավանականորեն նման է իրենց իսկ երկրում հայտնի խմբերից մեկի երգին: Ուշագրավ նորություն մեզ՝ հայերիս համար. Աշխարհահռչակ շանսոնյե Շառլ Ազնավուրի մասին կենսագրական ֆիլմ կցուցադրվի ֆրանսիական «France 2» հեռուստատեսությամբ: Այս մասին «Le Figaro TV Mag» պարբերականի հետ զրույցում հայտնել է ֆրանսուհի լրագրող եւ վավերագրող Մարի Դրյուկերը, որն էլ իրականացնում է ֆիլմի ստեղծման աշխատանքները: Չնայած վերջին շրջանում ամենաքննարկված ու քննադատված օպերայի՝ «Անուշի» մասին տարաբնույթ կարծիքների, այնուամենայնիվ օպերան վերջին օրերին դիտել են նաև Փարիզին հարակից Նանտեր քաղաքի «Ամանդյե» թատրոնում: Ֆրանսիայի մայրաքաղաքում թումանյանական մթնոլորտի տարածմանը հետևել է Bravo.am-ի սեփական թղթակիցը, ում փոխանցմամբ՝ ինչպես ցանկացած նոր երևույթ, «Անուշն» այստեղ ևս քննարկումների կիզակետում էր։ Սակայն «ավանդականի եւ նորամուծության բախումն» այս դեպքում միայն մի քանիսի ուշադրության կենտրոնում էր. գովեստների եւ քննադատությունների թեմաներն այլ էին. օրինակ, թարգմանության բարելավման անհրաժեշտություն, երաժշտության մեջ որոշ պահերի մոնոտոնություն, սրա հետ մեկտեղ հիանալի վոկալ եւ կատարում։
Տիգրանուհի Թասլակյան
