Երևանի քաղաքապետը որևէ առիթ և պատճառ չունի խուսափելու բյուջետային քննարկումներից, պարզապես այսօր հարգելի պատճառով չէր կարող մասնակցել: Այս խորհրդարանում սույն պատճառաբանությունը ներկայացրեց Երեւանի փոխքաղաքապետ Կամո Արեյանը՝ 2012 թվականի բյուջեի կատարողականի քննարկման ժամանակ, պատասխանելով ԱԺ ՀԱԿ խմբակցության պատգամավոր Նիկոլ Փաշինյանի հարցին, թե ինչո՞ւ քաղաքապետը չի ներկայացնում բյուջեի ծախսերը:
Պատգամավորի հաջորդ հարցը վերաբերում էր Երևանի քաղաքապետարանի կողմից հայտարարված մրցույթին` Հանրապետության հրապարակի արդիականացման հետ: «Ի՞նչ մրցույթ է դա և ի՞նչ սպասենք հրապարակի վերակառուցման արդյունքում»,- հարցրեց Նիկոլ Փաշինյանը: Կամո Արեյանի խոսքով` Հանրապետության հրապարակի վերակառուցման շուրջ մրցույթ հայտարարելու հարցը քննարկվել է դեռևս երկու տարի առաջ, սակայն, այն չի ենթադրում բառիս բուն իմաստով վերակառուցում: «Մրցույթի նպատակն է ներգրավելու առաջարկներ` տրանսպորտի ծանրաբեռնվածությունը թեթևացնելու, ստորգետնյա հատվածն օգտագործելու, ինչպես նաև հրապարակի աջ թևի կառուցվածքը հստակեցնելու համար»,- ասաց փոխքաղաքապետն ու հավելեց, որ մյուս տեղեկատվությունը կտրամադրի Երևանի գլխավոր ճարտարապետը:
Նելլի ԳՐԻԳՈՐՅԱՆ
