Մնաց մեկ օր, և գարնանային տրամադրությանը կփոխարինի ամառը՝ իր գույներով, երանգներով ու ջերմությամբ: Ոմանք շատ ուրախ են, և արդեն ծրագրում են ինչպե՞ս անցկացնել ամառային հանգիստը, ո՞ւր գնալ, ինչպե՞ս այն վայելել, ոմանք էլ տխրում են, չէ՞ որ գարունն ամենաթարմ ու գեղեցիկ եղանակն է, որին հրաժեշտ ենք տալիս:
«Ոնց չեմ ուզում գարունը գնա, – ասում է 18-ամյա Արաքսյան, – այնքան խինդ ու ծիծաղ կա գարնան մեջ, այնքան թարմություն ու աշխույժություն, իսկ ամռանը շա՜տ շոգ է, որևէ բան անելու հավես չես ունենում»:
20-ամյա Իրինան ևս տխուր է այդ փաստով. «Ամառը միշտ այնքան երկար է թվում ինձ, երևի նրանից է, որ 3 ամիս հանգստանում ես ու անգամ հանգստից հոգնում»: Կարծում է՝ գարունը եղանակների ոսկե միջինն է՝ ոչ շատ ցուրտ, ոչ էլ շոգ. «Իսկ ոսկե միջինը միշտ լավագույն տարբերակն է ամեն հարցում», – նշում է նա:
«Ծով, արև, ավազ, ծառեր… զարմանում եմ՝ ինչպե՞ս կարելի է չսիրել այս հրաշքը», – ասում է 24-ամյա Ելենան: Ամռանն է ծնվել, հավանաբար դա էլ ամառը սիրելու ևս մեկ պատճառն է, ասում է. «Պարզապես պետք է ճիշտ և արդյունավետ անցկացնել այն, հանգստանալ՝ չկորցնելով աշխատունակությունը»
Կարդացեք նաև
«Ամառն ինձ համար մտածելու շրջանն է, – ասում է 26-ամյա Ռիտան, – այնպես է ստացվել, որ արդեն որերորդ տարին է ես սեպտեմբերից փոխում եմ աշխատանքս ու դա հավանաբար ամռանը երկար մտածելու ու ավելիին ձգտելու արդյունքն է: Միշտ մեկնում եմ ծով, հանգստանում ու նոր ծրագրերով վերադառնում»:
19-ամյա Հեղինեն էլ թեև չի ուզում գարունը գնա, բայց կարծում է ամառն էլ իր հետաքրքրություններն ունի. «Գրքերի ցանկ եմ գրել, որոնք պետք է այս ամռանը ընթերցեմ, պարապելու եմ, լեզուներ եմ սովորելու, մի խոսքով ամառն ինձ համար հանգստանալու համար չէ, այլ նոր բաներ սովորելու ու գիտելիքն ավելացնելու»- ասում է նա:
Ամռանն ընդառաջ առաջարկում եմ լսել լավագույն երգերից մեկը.
Տիգրանուհի Թասլակյան
