Այսօր «Նովոստի» միջազգային մամուլի կենտրոնում Հայաստանի առաջին օմբուդսմեն, «Ընդդեմ իրավական կամայականությունների» հկ-ի գործադիր տնօրեն Լարիսա Ալավերդյանն խոսեց ԼՂՀ–ի շուրջ ծավալվող գործընթացների թեմայով:
«Ես մի քիչ զարմացած էի, որ չնայած հնչած հայտարարություններին, հասարակության մեջ, մամուլում, չտեսա ակտիվություն, որը ցուցաբերում են միջազգային շրջանակներում: Կարծես ընտելացել ենք, որ մեր հարցերը պետք է լուծեն օվկիանոսի այն կողմերից: Ես կցանկանամ, որ մենք խուսափենք ինքնապահպանության բնազդից»,- նշեց Ալավերդյանը՝ հավելելով, որ հնչում են հայտարարություններ, թե ստատուս քվոն այլեւս հնարավոր չէ հանդուրժել, բայց այդ ո՞ր մի ստատուս քվոյի մասին է խոսքը, հարցնում է նա: «Այսօրվա ստատուս քվոն 25 տարվա ընթացքում ստեղծված իրավիճակ է եւ ես ուզում եմ հասկանալ, թե որն է այս տարիների սխալը»,- ասաց Ալավերդյանը:
Ի՞նչ ռետրո-մարմաջ է` վերադառնալ ստալինյան քարտեզներին, հարցնում է Ալավերդյանը՝ նշելով, որ բոլորն էլ լավ հասկանում են, թե ինչ իրավիճակ է տիրում Ադրբեջանում, եւ այդ ինչ մի շքերթ է, որը տեղի է ունեցել Ադրբեջանում օրեր առաջ, կամ ինչ ավանսներ են եւ քաղաքական. «Այդ ինչպե՞ս է, որ երբ Հայաստանում ավարտվում են ընտրությունները՝ այնտեղ հանգստանում են, այժմ գալիս է պահը Ադրբեջանի նախագահական ընտրությունների, որտեղ ժառանգաբար իշխանություն է վերցված Ալիեւի կողմից: Մենք պետք է հասկանանք, որ այս ամենը մարտահրավեր է երկու երկրների քաղաքացիական հասարակության համար»:
Եվա ՀԱԿՈԲՅԱՆ
