Վորոնեժի դատարանը 5 տարվա պայմանական ազատազրկման է դատապարտել Սուրիկ Բրոյանին, որը մարդկանց ստիպողաբար աշխատացնում էր առանց վարձատրության: Հայտնում է «Լենտա» լրատվականը:
Հետաքննությունը պարզել է, որ 2011թ. սեպտեմբերին Բրոյանը իր մոտ աշխատելու է ընդունել երեք ֆիզիկապես ուժեղ տղամարդկանց ու կարգադրել նրանց, որ իր ֆերմա բերեն անտուններին ու մարգինալներին (կամ մարդկանց, որ իր աշխատակիցները այդպիսին էին համարում) ու ստիպեն, որ առանց վարձատրության աշխատեն:
Հսկիչները ծեծում էին տուժողներին, փակի տակ պահում, շղթայում ու վերցնում նրանց փաստաթղթերը: Եթե նրանցից որեւէ մեկը փախչում էր, նրան գտնում էին ու պատժում: Հետաքննության ժամանակ ի հայտ է եկել չորս տուժողներ (սակայն ոստիկանության գործողության ժամանակ ֆերմայում հայտնաբերվել էր 20 աշխատողներ):
Լրագրողներին հաջողվել է զրուցել տուժողներից մեկի՝ 37-ամյա Սերգեյ Գորդիենկոյի հետ: Նա պատմել է, որ «Գազելով» գնում էր իր ծանոթին հանդիպելու: Մեքենայի վարորդը նրան ֆերմայում աշխատանք էր առաջարկել, բայց նա հրաժարվել էր: Սակայն վարորդը տարել էր նրան Պարուսնոյե գյուղ, որտեղ գտնվում էր Բրոյանի ֆերման: Գորդիենկոն փորձել էր փախչել, բայց հսկիչը բռնել ու ծեծել էր: Նա կորցրել էր գիտակցությունը, իսկ գիշերը ուշքի եկել փակ տարածությունում: Դրանից հետո նրան ստիպել են օրը 12 ժամ հետեւել խոզերին:
Կարդացեք նաև
Ֆերմայում չգիտեին, որ Գորդիենկոն մեկնելուց առաջ իր ծրագրերի մասին պատմել էր մորը: Նա ասել էր, որ գնում է ժամադրության եւ կվերադառնա երեք օրից: Տեսնլեով, որ որդին չի վերադառնում՝ մայրը դիմել էր ոստիկանություն:
Գորդիենկոն փախուստի ծրագրեր էր մշակում: Պահակներն իմանալով դրա մասին՝ ծեծել են նրան ու ստիպել սպիրտ խմել: Նա քնել էր խիստ տաք խողավակների մոտ ու այրվածք ստացել: Բրոյանը չէր ուզում, որ նա ֆերմայում մեռներ ու տեղափոխել էր նրան գյուղի հիվանդանոց: Սակայն Գորդիենկոյի վիճակն այնքան էր ծանրացել, որ նրան տեղափոխել էին Վորոնեժի շրջանային հիվանդանոցը: Այնտեղ պարզվել էր, որ նա որպես անհայտ կորած գտնվում է հետախուզման մեջ: Ուշքի գալով՝ Գորդիենկոն ցուցմունք է տվել, ինչից հետո ոստիկանները մեկնել են ֆերմա:
Պատրաստեց Հովհաննես ԻՇԽԱՆՅԱՆԸ
