Երկու շաբաթ է՝ Գյումրի քաղաքից մոտ 7-10 կիլոմետր հեռավորության վրա գտնվող Ախուրյան համայնքի բնակիչները զրկված են տրանսպորտից. երթեւեկող միակ ավտոբուսի շահագործման պայմանագրի ժամկետը լրացել է, նոր մարդիկ էլ չեն ուզում մրցույթի մասնակցել ու գծատեր դառնալ` ոչ շահութաբեր լինելու պատճառաբանությամբ: Այսօր Շիրակի մարզպետարանի դիմաց նոր ախուրյանցիները բողոքի ցույց են կազմակերպել`Շիրակի մարզպետ Ֆելիքս Ցոլակյանից ու փոխմազրպետ Սեյրան Պետրոսյանից բավականին խիստ տոնով պահանջելով լուծել իրենց խնդիրը:
Բանն այն է, որ ախուրյանցիներից շատերը Գյումրիում են աշխատում, երեխաները հենց այս քաղաքի դասախոսների մոտ են մասնավոր պարապում, իսկ տաքսիներով գնալ-գալը կրկնակի թանկ է նստում: Շիրակի փոխմարզպետ Սեյրան Պետրոսյանը Aravot.am-ի հետ զրույցում պարզաբանեց, որ տվյալ երթուղու շահագործման ժամկետը լրացել է, հայտարարված նոր մրցույթին էլ հայտ ներկայացնող չկա, քանի որ շահութաբեր չէ, ժամը 6-ից հետո մարդ չի երթեւեկում, նմանապես մարդկանց հոսքը շատ չէ շաբաթ-կիրակի օրերին, իսկ այս ամենը բիզնես է, եւ գծատերը տուժում է: Հենց այդ պատճառով էլ բոլորը փախչում այդ գծից: Հիմա մարզպետարանը, ըստ փոխմարզպետի, ամեն ինչ անում է համոզլու, որպեսզի որեւէ մեկը մասնակցի այս մրցույթին, որոշակի ներդրումներ պիտի կատարի նա եւ համայնքապետարանը:
Մեզ հետ զրույցում գյուղապետի տեղակալ Լիպարիտ Տիգրանյանն ասաց, որ համայնքը ֆինանսապես ի վիճակի է ավտոբուս գնել, սակայն խնդիր է երկաթուղի մտնել, հենց այնպես չեն կարող սպասարկել, անհրաժեշտ է մրցույթի մասնակցել, հաղթող ճանաչվել: Փոխգյուղապետի ասելով, թեեւ Ախուրյան գնացող տաքսիները շատ լավ աշխատում են, սակայն միայն տաքսիների հույսին մնալը հարցի լուծում չէ, քանի որ դա թանկ է նստում բնակիչների վրա ու հարցին խելամիտ լուծում է պետք: Շիրակի մարզպետարանում խոստացել են հարցը լուծել հաջորդ շաբաթվա ընթացքում:
Կարդացեք նաև
Նունե ԱՐԵՎՇԱՏՅԱՆ
