Այս տարվա մայիսի 16-ի ՀՀ կառավարության նիստում` վարչապետ Տիգրան Սարգսյանը հայտնեց, որ կառավարությունը որոշել է համընդհանուր սուբսիդավորում իրականացնել գազի գնի 30 %-ի չափով: Այսինքն` ճիշտ հակառակ կարծիք հայտնեց 4 տարի առաջ հնչեցրած իր տեսակետին. 2009 թ. դեկտեմբերի 25-ին կառավարության նիստում, ՀՀ վարչապետ Տիգրան Սարգսյանը հարցին, թե հնարավո՞ր է, որ ինչպես նախկինում էր, կառավարությունը սուբսիդավորի գազի գինը, վարչապետը պատասխանել էր. «Իմ մտքով նման բան չի անցել։ Եվ Ձեզ խորհուրդ եմ տալիս ոչ մեկի նման բաներ չհուշել։ Ոչ, ես կողմնակից չեմ»։
Aravot. am-ը վարչապետից հետաքրքրվել էր, թե ինչո՞վ է բացատրում այս հակասությունը:
Վարչապետի մամուլի քարտուղար Հարություն Բերբերյանը մեր գրավոր հարցմանն այսպես պատասխանեց. «Հայաստանի Հանրապետության վարչապետ Տիգրան Սարգսյանն առիթ ունեցել է հայտարարելու, որ սուբսիդավորման մեխանիզմները ընդհանրապես շատ տարբեր են լինում: Սուբսիդավորման այն մեխանիզմը, որը առաջարկվում է, այժմ մենք քննարկում ենք Ռուսաստանի Դաշնության մեր գործընկերների հետ եւ դրա արդյունքների մասին անպայման կտեղեկացվի հանրությանը՝ բանակցությունների ավարտից անմիջապես հետո»:
Լուսինե ԲՈՒԴԱՂՅԱՆ
