«Ժառանգության» գլխավոր քարտուղար Ստյոպա Սաֆարյանի գնահատմամբ, վերջին մեկ տարվա ընթացքում Հայաստանում անցկացված չորս ընտրությունների արդյունքում ոչինչ չփոխվեց:
«Այս անգամ էլ ՀՀԿ-ն նույն ձեւով, պետական լծակների եւ ընտրությունների անվերահսկելիության արդյունքում վերարտադրվեց»,- այսօր Կովկասյան ինստիտուտում «Ընտրական տարվա արդյունքները» թեմայով քննարկման ժամանակ ասաց պարոն Սաֆարյանը:
Նրա խոսքերով, իշխանությունները խոստացան բիզնեսի եւ քաղաքականության սերտաճումը խորհրդարանում կանխել, բայց արդյունքում գործարարները խորհրդարան եկան մեծամասնական ընտրակարգով. «Արդյունքում իշխող կուսակցությունը 41 տոկոսանոց բոնուս է ստանում, մեկ երրորդը իշխանությունը կանխավ կարող է համարել իր գրպանում դրած, որովհետեւ այդտեղ մարդիկ են, անցնում, որոնց մեջքին թփթփացնում են իշխանությունները»:
Պարոն Սաֆարյանը դժգոհեց, որ նախագահական ընտրություններին 1988 տեղամասերը բացելու իրենց պահանջից ոչ մեկը չբավավարվեց, ըստ նրա, վերահաշվարկ է եղել միայն ընտրատարածքային ընտրական հանձնաժողովի նախագահների որոշմամբ ու այն տեղամասերում, որտեղ պարկերը բացված էին. «Ի տարբերություն ավագանու ընտրությունների, նախագահական ընտրություններին մանիպուլյացիաները տեղի են ունեցել ընտրացուցակներում քվեարկողների թվի ուռճացմամբ: Սեփական բնակարաններում այլ անձանց գրանցելու թույլտվությունն էլ Հայաստանում այլեւս փող արժե, դրա միջոցով էլ մարդիկ փող աշխատեցին»:
Կարդացեք նաև
ԱԺ ՀՀԿ խմբակցության պատգամավոր Մկրտիչ Մինասյանն էլ պատմական ակնարկ ներկայացրեց, թե ընտրություններին ինչ կատարվեց: Նա առաջընթաց համարեց, որ խորհրդարանական ընտրություններին մեծամասնական ընտրակարգով տասնութ նոր մարդ է համալրել ԱԺ-ն եւ նույնքան էլ համամասնական ցուցակով: Ընտրությունների արդյունքում, ըստ ՀՀԿ-ական պատգամավորի, քաղաքական նոր մշակույթ ձեւավորվեց: Մասնավորապես պատգամավորը նկատել էր թշնամանքի եւ զանգվածային անկարգությունների պակաս՝ նախորդ ընտրությունների համեմատ: Վերջում էլ հավելեց, որ ՀՀԿ-ն չի ասում, թե բացթողումներ չեղան, այլ հակառակը եւ պատրաստ է բացթողումները վերացնել, որ հաջորդ ընտրություններն ավելի լավ անցնեն:
Նա նաեւ ասաց, որ պատասխանատվությամբ պետք է մոտենալ այն ձայներին, որոնք մեր հանրությունն է տվել ՀՀԿ-ին. «Պետք է հնարավորություն ստեղծենք, երկրի առջեւ ծառացած խնդիրները լուծելու համար: Դրա համար պետք է գործուն ընդդիմություն՝ իր ծրագրերով, որ կարողանա առաջարկություններ ու ծրագրեր ներկայացնի: Իշխանությանն էլ պետք է հանդուրժողականություն, որ այն ծրագրերը, որոնց մեջ կան իրատեսություն, դառնան իրականություն:
Արփինե ՍԻՄՈՆՅԱՆ
