Այսօր «Ուրբաթ» ակումբում Կոռուպցիայի հակազդման ասոցիացիայի նախագահ Ալեքսանդր Ամարյանը խոսեց դատափաստաբանական մարմիններում բացահայտ տեղի ունեցող կոռուպցիոն դրսեւորումների մասին:
Ամարյանը նշեց, որ Եհովայի վկաները հաղթեցին դատարանում, որովհետեւ Եվրոդատարանը որոշումը կայացրել է քրեադատավարական նորմերի խախտմամբ, այսինքն`մեղքը իրավապահ մարմիններինն ու դատական համակարգինն է, որի արդյունքում այսօր կառավարությունը 114 հազար եվրո տուգանք, գումարած 10 հազար` դատական ծախսերի համար, պետք է վճարի Եհովայի վկաներին:
«Մեզ մոտ դատական համակարգը դարձել է անձեռնմխելի: Հասարակ քաղաքացին պաշտպանված չէ, դատարանը ամեն դեպքում կայացնում է այն որոշումը, որն իրեն է պետք: Դատավորներն ունեն իրենց իրավաբանական գրասենյակներն ու իրենց ձեռքի փաստաբաններին, դրանք «չոռնի օտվակատներն» են ու քաղաքացին, երբ խնդիր է ունենում, ուղղորդում են նրա մոտ»:
Ամարյանն ասաց, որ մեր փաստաբանների մի մասը փաստաբաններ են չակերտներով, նրանք դատական համակարգում միջնորդի կարգավիճակում են` այսինքն, որ մտնեն խոսեն, գումարային հարցերը պարզեն, գործարք անեն`«Մեզ մոտ գործում է հեռախոսային իրավունքը»:
Կարդացեք նաև
Ամարյանի խոսքով` ոլորտում տեղի ունեցող կոռուպցիոն մեխանիզմները տեղի են ունենում հեռախոսի, սեփական գրասենյակների, անձնական կապերի, վերադաս մարմինների կողմից դատավորների վրա ոտնձգություն կատարելու միջոցով՝ կաշառելով:
Եվա ՀԱԿՈԲՅԱՆ
