ՆԺԿ ղեկավար Արամ Կարապետյանի գնահատմամբ, ՀՀ նախագահ Սերժ Սարգսյանի գեոքաղաքականությունը վերջանում է փող ուզելով:
«Որ երկրի հետ փոխհարաբերությունները նայեք, անպայման վերջում կտեսնեք, որ գալիս է վարկերի, հարկերի գործողություններով, որոնք կապված են ֆինանսական ռեսուրսների հետ»,- այսօր «Վարկած» ակումբում ասաց պարոն Կարապետյանը:
ՀԱՊԿ-ի ոչ պաշտոնական գագաթաժողովին Սերժ Սարգսյանի չմասնակցելու հիմնական պատճառն էլ, ըստ պարոն Կարապետյանի. «Ոչ թե գեոքաղաքական պատկերացումներն էին, որ մենք գնում ենք Եվրոպա, Եվրասիական միությունը կարող է խանգարել եւ այլն, այլ կարծում եմ՝ գազի սակագնի բարձրացումն էր, սուբսիդավորման խնդիրների չլուծումը: Որովհետեւ ինչքան հասկացա Տիգրան Սարգսյանի պատասխանից, մենք ասել ենք 30%, բայց փողը որտեղի՞ց, դեռ բանակցում ենք, hասկացա, որ 30% սուբսիդավորումն էլ են ուզում ռուսներից: Հիմա էլ ասում են` եթե դուք չեք սուբսիդավորում, փող չեք տալիս, ինչ ՀԱՊԿ, ինչ մաքսային միության քննարկում, ինչ Եվրասիական միություն»:
ՆԺԿ նախագահի խոսքերով, Սերժ Սարգսյանը ավելի է խճճում հայկական փոխհարաբերությունները Ռուսաստանի հետ. «Խճճված պարանն այնքան է ձգել, որ կտրվելու վրա է… Սերժ Սարգսյանի քաղաքականության մեջ չկա կոնցեպտ, պատկերացումներ չկան, բոլորի հետ փորձել լավ հարաբերություններ ունենալը չի ստացվի»:
Կարդացեք նաև
Նա նաեւ ասաց, որ ԵՄ-ը նախընտրելով Հայաստանը գնում է մի տեղ, որտեղ ծանր կացություն է. «Ռուսաստանում էլ է ծանր կացություն, բայց այնտեղ գոնե մեզ համար հասկանալի են միտումները»:
Արփինե ՍԻՄՈՆՅԱՆ
