Ազատության հրապարակում այսօր երեկոյան «ասեղ գցելու» տեղ չկար: Օպերայի եւ բալետի ազգային ակադեմիական թատրոնում Ուելսի արքայազն Չարլզի պատվին անցկացվող համերգի մասնակիցները իրենց մեքենաները կայանել էին հենց հրապարակում:
Հիշեցնենք, որ Ազատության հրապարակում Րաֆֆի Հովհաննիսյանին երկու ամիս առաջ Ոստիկանությունը չթույլատրեց վրան տեղադրել՝ պարզաբանելով, որ ասֆալտը պատմամշակութային արժեք է, եւ վրանի մեխերը կարող են հրապարակի ասֆալտը փչացնել:
Երեւանի փոխոստիկանապետ Վալերի Օսիպյանը, ով այսօր հրապարակում էր ու կարգադրում էր ճանապարհ բացել հրապարակում կայանելու եկած մեքենաների համար, մշակութային արժեք համարվող ասֆալտը տասնյակ մեքենաների կայանելուց վնասվելու վտանգ չէր տեսնում:
Կարդացեք նաև
«Սա առանձնահատուկ միջոցառում է, ամեն անգամ չէ, որ արքայազն է այցելում Հայաստան: Եվ բացի այդ, ասֆալտը չեն վնասում, ի՞նչ պետք է վնասեն: Սա ժամանակավոր բան է, վրան չէ, որ բերեն մի քանի օրով դնեն: Մեքենաներ են, որ մի քանի ժամից կհեռանան»,- ասաց պարոն Օսիպյանը՝ վստահեցնելով, որ մեքենաների կայանելու հարցը համաձայնեցված է մշակույթի նախարարության եւ քաղաքապետարանի հետ:
Հետո էլ հավելեց, որ եթե վրան տեղադրելու հարցն էլ համաձայնեցնեն, Ոստիկանությունում վրանի տեղադրման խնդիր չեն տեսնի:
Ակտիվիստներից մեկն էլ կատակեց. «Պարոն Օսիպյան, եկեք գնանք աղոթենք»: Պարոն Օսիպյանն էլ հորդորեց. «Ծիծաղի առարկա դարձնելու փոխարեն լավ կլինի հաճախ եկեղեցի մտնեք»:
Ակտիվիստն էլ շարունակեց. «Այնպիսի տպավորություն է, որ եկեղեցին ու ոստիկանությունը համագործակցության հուշագիր են ստորագրել, եւ եկեղեցին իր PR-ը վստահել է ոստիկանությանը»: Փոխոստիկանապետն էլ ասաց՝ ոստիկանը նախ մարդ է, հետո նոր ոստիկան. «Սա առաքելություն է, որն իրականացնում ենք»:
Մանրամասները շուտով` տեսանյութում:
Արփինե ՍԻՄՈՆՅԱՆ
Իսկ մենք հակառակը գիտեինք, որ ոդտիկսնը նախ ոստիկան է, հետո մարդ: