«Պահպանիչ սետկաներն այնքան թանկ են, որ ոչ գյուղացին, ոչ էլ պետական միջոցներով կարելի է դա անել: Նման աղետ քառասուն-հիսուն տարին մեկ է լինում: Հակակարկտային կայաններն օգնում են, երբ կարկտային ամպերը նոր-նոր ձեւավորվում են: Սա աղետ էր եւ ոչինչ օգնել չէր կարող»,- այսօր խորհրդարանում բյուջեի կատարողականի քննարկումների ժամանակ ասաց ԱԻՆ փոխնախարար Հայկարամ Մխիթարյանը:
Փոխնախարարը պատասխանում էր «Ժառանգություն» խմբակցության պատգամավոր Թեւան Պողոսյանի հարցին, որը վերաբերվում էր վերջին շրջանում տեղացած կարկուտների ժամանակ ծառայության աշխատանքներին:
Այնուհետեւ պատասխանելով Խաչատուր Քոքոբելյանի հարցին, փոխնախարարն ասաց, որ նման ցանցերով մեկ հեկտար խաղողի այգու ծախսը կազմում է տասից-տասնհինգ հազար դրամ:
Ի դեպ, ըստ փոխնախարարի, Հայաստանը պետք է կարկտակայանների երկրորդ պաշտպանիչ շերտ ստեղծի: Դրա համար մոտ հազար կարկտակայան կպահանջվի, իսկ դրանցից յուրաքանչյուրի արժեքը կազմում է վեց միլիոն երեք հարյուր հազար դրամ:
Կարդացեք նաև
Նախկին արտգործնախարար Ալեքսանդր Արզումանյանն էլ հետաքրքրվեց`փորձե՞լ է հայկական կողմը բանակցել Թուրքիայի հետ, որպեսզի կարկտային ամպերը չեզոքացվեն հենց Թուրքիայի տարածքում եւ Հայաստան չգան: Փոխնախարարն ասաց, որ խորհրդային տարիներին նման փորձ եղել է, հրանոթներով կրակել են անգամ Թուրքիայի սահմանի ուղղությամբ`չեզոքացնելով ամպերը, բայց այժմ, այդ հրանոթները չկան, քանի որ պատերազմի տարիներին դրանք ռազմաճակատում են օգտագործվել: Այժմ, Թուրքիայի հետ նման բանակցություններ չեն տարվել:
Նրա կարծիքով, Հայաստանն այժմ իր հակակարկտային երկրորդ պաշտպանական շերտը պետք է փորձի ամրապնդել: Հայաստանում կա երկու ռադիոլակացիոն կայան, ինչն, ըստ նրա, բավարար չէ: Փոխնախարարն ասաց, որ ևս երեք ռադիոլակացիոն կայանի անհրաժեշտություն կա` ծածկելու կարկուտի երկրորդ և երրորդ գոտին: Հ.Մխիթարյանը նշեց, որ հակակարկտային կայանների գործունեությունը պետք է տրվի արտակարգ իրավիճակների նախարարությանը:
Նելլի ԳՐԻԳՈՐՅԱՆ
