Մի քանի տարի առաջ առնվազն 14-15 հազար տարվա պատմություն ունեցող, պատմական Սյունիքի տարածքում գտնվող ժայռապատկերներով են սկսել հետաքրքրվել օտարերկրացի մասնագետները: Հայտնի է նաեւ, որ Սյունիքի ժայռապատկերները աշխարհի հնագույն գաղափարագիր պատկերներն են, որոնք փորագրվել են այն մարդկանց կողմից, որոնք ունեցել են հայկական լեզվամտածողություն:
«Եկան, ժայռապատկերները կրկնօրինակեցին Փենսիլվանիայի համալսարանից, 2010 թվականին եկավ գերմանական խումբը, եւ հրատարակեցին իրենց նախնական արդյունքները՝ «Հնագիտությունը Հայաստանում» գրքում: Այդ խումբը ցանկություն հայտնեց, որ հայկական ժայռապատկերները գրանցվեն՝ որպես համամարդկային մշակութային արժեք»,- այսօր «Տեսակետ» ակումբում այս մասին ասաց հայագետ Համլետ Մարտիրոսյանը՝ հավելելով, որ գերմանացիները հայկական ժայռապատկերները ներկայացնում են որպես բրոնզեդարյան մշակույթի մի մաս, ինչն, ըստ մասնագետի, սխալ է:
Aravot.am-ը հայագետից հետաքրքրվեց, թե ի՞նչ խնդիրներ կան հայկական ժայռապատկերների պահպանման հարցում:
«Դե եթե այդ ժայռապատկերները գոյատեւել են հազարավոր տարիներ, ապա ինձ թվում է՝ մի քանի հազար տարիներ էլ կգոյատեւեն»:
Հայագետի խոսքով՝ ժայռապատկերների համար իսկական վտանգ են ներկայացնում այն մարդիկ, ովքեր, չգիտակցելով ժայռապատկերի հնությունն ու կարեւորությունը, կարող են իրենց անունները կամ այլ գրություններ թողնել դրանց վրա:
Հայագետն անձամբ է ուսումնասիրել հայկական ժայռապատկերները եւ իր աշխատանքի արդյունքները ամփոփել մի քանի հոդվածներում ու երկու մենագրությունների մեջ, որոնցից վերջինը լույս է տեսել 2012 թվականին՝ «Առյուծի» նշանագիրը Սյունիքի ժայռապատկերներում եւ Հին աշխարհում» վերնագրով:
Աշոտ ԱԹԱՅԱՆ
