Այսօր վարչապետ Տիգրան Սարգսյանի մասնակցությամբ տեղի ունեցավ Գյումրու լոկոմիտիվային ու վագոնային-վերանորոգման դեպոների վերաբացման արարողությունը:
Նշենք, որ Գյումրու լոկոմոտիվային դեպոյի վերակառուցման աշխատանքները սկսվել են դեռեւս 2010 թվականից եւ այդ նպատակի համար ներդրվել է 93.5 մլն ռուբլի, 48.4 մլն էլ ուղղվել է շարժակազմի նորոգման համար տեխնոլոգիական սարքավորումների ձեռքբերմանը:
Վերաբացման պաշտոնական արարողության ժամանակ վարչապետ Տիգրան Սարգսյանը ելույթ ունեցավ ռուսերենով` փորձելով շոյելով ռուսական կողմին, մասնավորապես «Ռուսական երկաթուղիներ» ԲԲԸ նախագահ Վլադիմիր Յակունինին, որն իր ելույթում նշեց, թե ռուսաց լեզուն շատ ավելի է, քան միայն հաղորդակցման միջոց ծառայելը:
«Վլադիմիր Իվանովիչի խոսքից հետո ես պարտավորվում եմ խոսել ռուսերեն լեզվով, որպեսզի հաստատեմ նրա խոսքերը, որ ռուսերենը ստեղծում է միասնական հասարակություն, այն ոչ միայն շփման լեզու է, այլ կարեւոր մշակութային հիմք է, որը մեզ այսօր միավորում է ռուս ժողովրդի հետ եւ ստեղծում է հատուկ ֆիզիկական տարածություն ԱՊՀ սահմաններում», -ասաց վարչապետը:
Կարդացեք նաև
[soundcloud url=”https://api.soundcloud.com/tracks/94317208″ params=”” width=” 100%” height=”166″ iframe=”true” /]
Լրագրողներից մեկը հենց այս դեպոյում վարչապետից հետաքրքրվեց, թե որքանո՞վ էր ճիշտ ռազմավարական նշանակություն ունեցող կառույցը կոնցեսիոն կառավարման իրավունքով հանձնել ռուսներին, ավելի նպատակահարմար չէ՞ր լինի, որ Հայաստանը ինքնուրույն ներդրումներ կատարեր երկաթուղում: Վարչապետը, լրագրողի այս հարցի պատասխանը հնչեցրեց մյուս` վագոնային-վերանորոգման դեպոյի բացման արարողության ժամանակ` անվերջ գովաբանելով ռուսներին ու շշպռելով լրագրողին `իրեն նման «անկոռեկտ» հարց հղելու համար: «Հարցը, իհարկե, տարօրինակ է, եւ այն ձեւակերպված է, մեղմ ասած, ոչ կոռեկտ. ամբողջ աշխարհը պայքարում է նրա համար, որպեսզի իր երկիր գրավի ներդրողներին եւ հիմա ի շնորհիվ կոնցեսիոն պայմանագրի մենք ունենք բազամամիլիարդանոց ներդրումներ մեր երկրի տնտեսության մեջ: Եվ սա անկոռեկտ հարց է, ընդհակառակը հայկական կողմը խորապես հետաքրքրված է, եւ այն ներդրումները, որոնք իրացվում են Հայաստանում ռուսական երկաթուղիների կողմից, տեսնում ենք, որ արդյունք է տալիս, ստեղծվում է ենթակառուցվածք տնտեսական աճի համար: Այստեղ հարցը ոչ միայն ներդրումներ են, այլ այն, որ պետք է ստեղծել միասնական երկաթուղային համակարգ: Հայաստանը չի կարող իր համար ստեղծել տեղական երկաթուղի, այն պիտի լինի համակարգում` մեծ երկաթուղու համակարգում: Եվ ակնհայտ է, որ այս տեսակետից ռուսական երկաթուղու հետ համագործակցությունը եւ աշխատանքը մեծամասամբ ճիշտ ուղի էր մեր տնտեսության ինտեգրացման համար», -ասաց վարչապետը`նշելով, որ հայկական կողմը ճիշտ ընտրություն է կատարել եւ կառավարությունը բավարարված է, որ երկաթուղին կոնցեսիոն կառավարման է հանձնել ռուսներին:
Նկատենք, որ մինչ վարչապետը փառաբանում էր ռուսներին, Գյումրու վագոնային –վերանորգման դեպոյի բանվորները, լրագրողներին տեսնելուն պես, բողոքում էին աշխատավարձից` նշելով, որ ռուսները ստրուկի տեղ են դրել մրի ու կեղտի հետ խաղ տվող աշխատակիցներին, միայն դեպոն են զարդարում`բացարձակ չմտածելով աշխատավարձի բարձրացման մասին:
Նունե ԱՐԵՎՇԱՏՅԱՆ
