«Անի պլազա» հյուրանոցում Րաֆֆի Հովհաննիսյանի վերջին հավաքի ժամանակ նախագահի նախկին թեկնածու Պավլիկ Սարգսյանը «Ժառանգություն» խմբակցության ղեկավար Ռուբեն Հակոբյանի ելույթից հետո վեճ սարքեց: Նա սկսեց քննադատել Ռուբեն Հակոբյանին, որ Մայիսի 9-ին ջերմ բարեւել էր Սերժ Սարգսյանին:
Aravot.am-ի հետ զրույցում Պավլիկ Սարգսյանը պատմեց, որ բարեւելու տեսանյութը երբ տեսել է, մտածել է՝ իշխանությունների կողմից սադրանք է եւ ուզում են Րաֆֆի Հովհաննիսյանի շարժման վրա ստվեր գցել: Այնինչ հետո Ռուբեն Հակոբյանը պնդեց, որ բարեւել է, լավ է արել: Ըստ Պավլիկ Սարգսյանի. «Ես բարեւելուն դեմ չեմ, բայց երբ հրապարակավ բարեւում են քաղաքական հակառակորդները…այնտեղ Շուշիի շատ ազատամարտիկների ես չտեսա, օրինակ՝ Սեֆիլյանին: Երբեւիցե որեւիցե կադրում Չախոյանին ես չեմ հանդիպել»:
Պավլիկ Սարգսյանը գտնում է, որ դրանով ազատամարտիկները վերաբերմունք են ցույց տվել այս իշխանություններին, իսկ Ռուբեն Հակոբյանը գնացել եւ ջերմ բարեւել է. «Րաֆֆի Հովհաննիսյանը եւ Սերժ Սարգսյանը երբ հանդիպեցին, իրար ձեռք սեղմեցին, դա քաղաքակիրթ է: Բայց երբ գնում ես տեսնում քո մարտական ընկերները այնտեղ նսեմացված են, այդ օրը ցույցի են նստած ազատամարտիկներ, Գյումրի են գնում միտինգի, մինչդեռ այնտեղ մի խումբ իրար ջերմ ձեռքսեղմումներ են անում, որից հետո՝ խրախճանք»:
Կարդացեք նաև
Պավլիկ Սարգսյանը նաեւ կարծում է, որ «Ժառանգության» կողմից Երեւանի ավագանու ընտրություններին մասնակցելը եւ մանդատները վերցնելը նույնպես սխալ է. «6 մանդատը ի՞նչ պիտի լուծի, կդառնա քաղաքապետարանը խորհրդարանի պես մի բան, որտեղ ընդդիմությունը առ ոչինչ է»:
Հռիփսիմե ՋԵԲԵՋՅԱՆ
