Այսօր Aravot.am-ը ԱԺ էթիկայի հանձնաժողովի անդամ, «Ժառանգություն» խմբակցության պատգամավոր Թեւան Պողոսյանից հետաքրքրվեց, թե իր կարծիքով ՀՀԿ պատգամավոր Սամվել Ալեքսանյանի դեմ «Թրանսփարենսի ինթերնեյշնլ» հ/կ-ի հայցը ինչքանո՞վ է հիմնավոր եւ կընդունվի՞ այն վարույթ, թե՞ ոչ:
Թեւան Պողոսյանն ասաց, որ կոնկրետ ինքը դիմումին ծանոթ չէ, դեռ քարտուղարությունն իրեն չի փոխանցել, բայց հանձնաժողովում պետք է նայեն՝ եթե ԱԺ կանոնակարգին հակասող որեւէ բան է արել Սամվել Ալեքսանյանը, այն կընդունեն վարույթ: Թեւան Պողոսյանը գտնում է, որ եթե նույն պատգամավորի դեմ մի քանի բողոք լինի եւ դրանք իսկապես էթիկայի կանոնների խախտում լինեն, ապա պատիժն անհամեմատ խիստ կլինի, ուստի որքան շատ լինեն դիմումները, այնքան պատգամավորներն ավելի զգաստ կլինեն եւ ավելի ընդունելի վարքագիծ կունենան:
Մենք փոխանցեցինք Լյուդմիլա Սարգսյանի տեսակետը, որ քանի որ խոսքը Սամվել Ալեքսանյանի մասին է եւ ընտրական գործընթացների, այն վարույթ հնարավոր է չընդունեն: Թեւան Պողոսյանը չհամաձայնեց. «Չեմ կարծում: Մի անգամ էլ է եղել Սամվել Ալեքսանյանի վերաբերյալ դիմում եւ ոնց որ թե որոշում են կայացրել: Այնպես որ ես չէի ասի, որ դա ինչ-որ անհնարին բան է: Հակառակը, եթե համապատասխանում է, անպայման վարույթ ենք ընդունելու եւ անպայման քննարկելու ենք այդ հարցը»:
Կարդացեք նաև
Հռիփսիմե ՋԵԲԵՋՅԱՆ
