«Թրանսփարենսի ինթերնեյշնլ» հ/կ-ն դիմել էր ԱԺ էթիկայի հանձնաժողով՝ խնդրելով քննել, թե ինչքանով է Երեւանի ավագանու ընտրություններին Սամվել Ալեքսանյանի վարքագիծը պատգամավորի վարքագծին հարիր եւ իրավաչափ: Խոսքը 8/08 ընտրատեղամասում Սամվել Ալեքսանյանի պահվածքի մասին է, որտեղ առաջացած խնդիրներից հետո նա այցելել է եւ հայտարարել՝ «Եկել եմ, որ ստեղ պրոբլեմ չլնի»:
Հ/կ-ն գտնում է, որ քվեարկության ընթացքին պատգամավորի անմիջական ներգրավվելը անթույլատրելի եւ անհամադրելի է պատգամավորի կարգավիճակին: Դա ընկալվում է որպես հսկողություն՝ ընտրական գործընթացի նկատմամբ:
Այս առնչությամբ այսօր Aravot.am-ի հետ զրույցում ՀԱԿ պատգամավոր, ԱԺ էթիկայի հանձնաժողովի անդամ Լյուդմիլա Սարգսյանն ասաց, որ Սամվել Ալեքսանյանի դեպքում հանձնաժողովը միգուցե բավարարի դիմումը. «Ինքը կարող է շատ հանգիստ ներողություն խնդրել՝ ի տարբերություն մյուսների: Բայց անձամբ ես մասնակցություն չեմ ունենալու այդ գործընթացին»:
Մեր հարցին՝ կարծում եք Սամվել Ալեքսանյանը այդքան հեշտ ներողություն խնդրողների՞ց է՝ նա պատասխանեց. «Չէ, ուղղակի ինքը դա կարող է շատ ցինիկ ձեւով անել, բայց անել: Դա իրեն շատ նման կլինի»:
Կարդացեք նաև
Մեր հարցին՝ «Թրանսփարենսի ինթերնեյշնլի» դիմումը տեղի՞ն եք համարում, որ պատգամավորն իրավունք չուներ խառնվել եւ վերահսկողի դեր կատարել ընտրական գործընթացներում՝ նա պատասխանեց. «Ոչ միայն այդ պատճառով, եթե Սամվել Ալեքսանյանի դեմ բողոքներ ուղղվեին էթիկայի հանձնաժողով, շատ ավելի ուրիշ պատճառներ կգտնվեին, բայց ինքս չեմ խորացել այդ հարցի մեջ: Մի կողմից էլ, քանի որ խոսքը վերաբերում է ընտրությունների գործընթացին եւ Սամվել Ալեքսանյանի վերահսկելուն, արդեն իսկ թեման որոշում է, որ դա հնարավոր է վարույթ չընդունեն, կամ եթե ընդունել են, դա կհամարեն, որ էթիկայի կանոններին չի հակասում, քանի որ խոսքը վերաբերում է ընտրական գործընթացին»:
Հռիփսիմե ՋԵԲԵՋՅԱՆ
