Aravot.am-ի հարցին՝ նվազագույն աշխատավարձի բարձրացման հետ զուգընթաց Հայաստանում կլինե՞ն թանկացումներ, թե՞ ոչ, ազգագրագետ Հրանուշ Խառատյանն պատասխանեց. «Թանկացումներ կլինեն: Կարող ենք քիչ թե շատ աչքաչափով հետազոտություն անել եւ որոշել: Մեր կառավարությունն երբեք այսպիսի համեմատությունները չի հրապարակայնացնում: Չեն հայտարարվում աղքատների թվերը, եւ մնացած այլ աշխատաշուկայից դուրս մղվող մարդկանց թվերը: Հիմնականում ստիպված ենք լինում դատողություններ անել: Ամբողջ աշխարհում միշտ էլ գները բարձրանալու միտում ունեն՝ Հայաստանում մասնավորապես: ԱԺ-ում ոմանց կողմից բարձրացվում է այս հարցն ու ընդհանրապես գնաճի, գնագոյացման քաղաքականության հարցն անհասկանալի է: Մեզ մոտ գնագոյացումը կարծես ոչ մի կերպ չի ենթարկվում ոչ մի օրինաչափության»
Դիտարկմանը՝ ստացվում է, որ կառավարության ծրագրի նվազագույն աշխատավարձերի բարձրացմանն ուղղված կետն ավելի շատ կվնասի՞՝ նա պատասխանեց. «Չգիտեմ, բայց մեր երկրում շատ է նվազում մարդկանց թիվը, եթե նույնիսկ նվազագույն աշխատավարձը բարձրանա էլ՝ դրանից մեր երկրի ընդհանուր վիճակը չի լավանա: Կառավարության ծրագրում անհասկանալի է, թե Հայաստանի կառավարությունն իր բյուջեի լցման ինչ հնարավորությունների վրա է դնում իր հույսը, աշխատավարձերը բարձրացնում է, արդար գույքահարկ սահմանելու վրա՞, նույնիսկ այդ արդարն էլ անհասկանալի է, թե ինչ է: Կառավարության տեսակետն այս հարցի հետ կապված շատ պարզ չէ, այսինքն, որ՞ն է արդարն, ու որը անարդարը»:
Եվա ՀԱԿՈԲՅԱՆ
