Այսօր «Նոյյան Տապան» լրատվական կենտրոնում Քաղաքական եւ իրավական հետազոտությունների կենտրոնի ղեկավար, Վրաստանի հարցերով փորձագետ Ջոնի Մելիքյանը անդրադարձավ Վրաստանի ներքաղաքական վերջին զարգացումներին:
«Վրաց հասարակության մեջ երկու տեսակետ է իշխում` հասարակության մի հատվածը կողմ է եվրոպական կառույցներին անդամակցելուն, մի հատվածն էլ՝ դեմ եվրոպական ինտեգրացիային, եւ ազգային–պահպանողական մոտեցմանն է կողմ` այսինքն հավատարիմ մնալ ազգային արժեքներին ու հեռու՝ սեռական փոքրամասնություններից, որոնք վերջերս ակցիա էին կազմակերպել Վրաստանում»,- նշեց Մելիքյանն ու անդրադարձ կատարեց օրերս տեղի ունեցած վրաց պաշտոնատար անձանց ձերբակալություններին: Նրա մեկնաբանմամբ` Վրաստանի նոր իշխանություններն այս հարցում շտապողական քայլեր են անում, ինչի արդյունքում երկրում լարվածությունն է մեծանում:
Անդրադառնալով ՆԳ նախկին նախարար Վանո Մերաբիշվիլիի ձերբակալության վերաբերյալ հնչեցրած Սահակաշվիլիի հայտարարությանը` թե այն քաղաքական բնույթ չունի՝ Մելիքյանը տրամաբանական համարեց ու ավելացրեց, այդ ձերբակալությունը եւ քաղաքական է, եւ իրավական. «Ձերբակալությունը քաղաքական է, քանի որ Վրաստանում շուտով նախագահական ընտրություններ են լինելու: Իրավական է, քանի որ նա յուրացրել է պետական միջոցները, դրան գումարած՝ մի քանի ամիս առաջ մեծ աղմուկ հանած բանտերում տեղի ունեցած խոշտանգումները»:
Եվա ՀԱԿՈԲՅԱՆ
