Այսօր ԱԺ-ում ՀԱԿ խմբակցության ղեկավար Լեւոն Զուրաբյանը ասուլիսում հայտարարեց, որ սենսացիոն տեղեկություն ունի, որը ստացան գազի գնի քննարկումից. «Պարզվում է, որ գների հանձնաժողովը՝ Ռոբերտ Նազարյանի գլխավորած, մայիսի 13-ին ստացել է գազի գնի բարձրացման հայտը, եւ այդ փաթեթում կցված է պայմանագիր, ըստ որի գազի նոր գինը, գործարքի մասին տեղեկությունը ուժի մեջ է ապրիլի 1-ից սկսած: Իհարկե, հանձնաժողովը պնդում է, որ դրա մասին իմացել է միայն մայիսի 13-ին: Մի բան պարզ է՝ մեկ ամիս առաջ այդ պայմանագիրը կնքվել է նոր գներով»:
Այսինքն, իշխանությունը կնքել է պայմանագիր, բայց դրա մասին տեղյակ չի պահել հայ ժողովրդին: Թաքցրել են. «Ինչու են այդպես արել, ուզում եմ հիշեցնել, որ տեղի ունեցան Երեւանի ավագանու ընտությունները, պարզ է ինչի համար են թաքցրել: Բայց հիմա պարզվում է, որ այդ ինֆորմացիան հասու է եղել մեր կառավարությանը նախագահական ընտրություններից առաջ»:
Ըստ Լեւոն Զուրաբյանի, իրականում, շատ լուրջ հիմքեր կան հայտարարելու, որ այդ գործարքը 2012-ի հոկտեմբերի 24-ին արդեն կնքված էր, առնվազն կար պայմանավորվածություն ռուսական կողմի հետ: Նրա գնահատմամբ՝ «Սա մախինացիա է, որի համար իրենք պիտի պատասխան տան»:
Լեւոն Զուրաբյանն ասաց, որ դեռ այլ ապացույցներ էլ են փորձում գտնել, բայց արդեն բոլոր հիմքերը կան հայտարարելու, որ ՀՀ իշխանությունները հասարակական կարծիքը մանիպուլյացիայի են ենթարկել: Իսկ սա նշանակում է, որ բոլոր հիմքերը կան, որ ՀՀ նախագահի եւ Երեւանի ավագանու ընտրությունները նորից անցկացվեն:
Կարդացեք նաև
Հռիփսիմե ՋԵԲԵՋՅԱՆ
