Այսօր ԱԺ քառօրյան ամփոփելիս «Ժառանգություն» խմբակցության ղեկավար Ռուբեն Հակոբյանը խոսելով կառավարության ծրագրի մասին՝ ասաց. «Ես չէի ասի այդ ծրագիրն այդքան վատ ծրագիր է: Պարզապես որեւէ ծրագիր այս համակարգին հակացուցված չէ: Այս համակարգը ունակ չէ որեւէ ծրագիր իրականացնել: Ծրագում նշված է, որ պետք է վերջ տալ կոռուպցիային, հարկային դաշտ բերել ստվերային տնտեսությունը, բայց այս համակարգը հակահամակարգ է դրան»:
Նա չբացառեց մեր երկրում սոցիալական բունտը. «Եթե դրան գումարենք բնական աղետը, որ տեղի ունեցավ եւ ամենակարեւորը՝ գազի գինը, սա արդեն իսկապես լուրջ մտածելու եւ անհանգստանալու առիթ է»:
Հարցին՝ Դուք մտածողության փոփոխություն տեսա՞ք դահլիճում՝ Ռուբեն Հակոբյանը պատասխանեց, որ ճաշակի հարց է. «Քաղաքական առումով ես կարծում եմ վատ քննարկումներ չէին: Ես չգիտեմ ինչ նկատի ունի պարոն վարչապետը, երբ ասում է մտքի հեղափոխություն, պետք է ընդամենը փաստել, որ լավ քննարկումներ տեղի ունեցան»:
Նա վստահեցրեց, որ անթույլատրելի է դիտում Գալուստ Սահակյանի վիրավորանքները՝ Զարուհի Փոստանջյանի հասցեին. «Եթե մի կողմ թողնենք նրա տարիքը եւ դերը խորհրդարանում, զուտ տղամարդկային առումով դա տղամարդուն վայել արարք չէ»: Ռուբեն Հակոբյանը տեղեկացրեց, որ իր համար անթույլատելի է նաեւ «Ժառանգության» անդամների կողմից վիրավորական արտահայտությունները եւ նիստից հետո այդ մասին ասել է Զարուհուն: Ռուբեն Հակոբյանը վստահեցրեց, որ Գալուստ Սահակյանը պետք է իր մեջ տղամարդկություն ունենա եւ ներողություն խնդի Զարուհուց:
Կարդացեք նաև
Հռիփսիմե ՋԵԲԵՋՅԱՆ
