Երեկ Թելավիում գտնվող Մեդիա-սրճարանում բացվեց միջազգային լրագրողական սեմինար «Մեդիան» եւ իշխանությունը» թեմայով, որ նախաձեռնել էր շվեդական Fojo Media Institut-ը:
Մեդիա-սրճարանի մոտ լրագրողներին դիմավորեցին վրացական թատերական զվարճալի համարով: Մեդիա-սրճարանի հիմնադիր, Վրացական տարածաշրջանային մեդիա ասոցիացիայի (GRMA) եւ «Կախեթիայի ձայն» թերթի ղեկավար Մայա Մամուլաշվիլին պատմեց, որ մեդիա-սրճարան ստեղծելու գաղափարը երկու տարի առաջ է ծնվել, այն փոքրիկ բիզնես է՝ թերթի անկախությունը ապահովելու համար, ինչպես նաեւ լրագրողների հանդիպման վայր է, որտեղ կայանում են մասնագիտական բանավեճեր, գրքերի շնորհանդեսներ:
Սեմինարը վարում էր շվեդ լրագրող Պեր Էներուդը: Նա երկար տարիներ եղել է Մոսկվայում շվեդական ազգային հեռուստատեսության թղթակիցը:
Քննարկվեց մի քանի թեմա՝ «Ինչ բարդ իրավիճակներում է հայտնվում մամուլը՝ իշխանությունների հետ կապված», «Մամուլի դերը» եւ այլն: Քննարկվեցին լրագրողական էթիկայի խնդիրները ու բերվեցին օրինակներ շվեդակական մամուլից: Այնուհետեւ լրագրողներին բաժանեցին խմբերի ու տվեցին կոնկրետ առաջադրանքներ: Օրինակ մեր խմբի առաջադրանքն էր՝ «Սեւացնե՞լ, թե պոզիտիվ գրել»:
Կարդացեք նաև
Զրույցներից պարզ դարձավ, որ նախկին խորհրդային երկրների ԶԼՄ-ները ունեն ընդհանուր խնդիրներ: Ուկրաինացի լրագրողներից մեկը մտահոգություն հայտնեց իրենց երկրում մամուլի մոնոպոլիզացիայի միտումների առիթով եւ նշեց, որ այնտեղ իրեն հարգող յուրաքանչյուր օլիգարխ իր առաջ խնդիր է դնում անպայման բացել ֆուտբոլային ակումբ կամ հետուսաալիք ունենալ: Ադրբեջանի ներկայացուցիչ, New Baku Post թերթի ռուսական բաժնի քաղաքական մասի պատասխանատու Նամիկ Իբրահիմովը համաձայն չէր այն մտքի հետ, թե լրագրողը պետք է պատասխանատու լինի իր ստորագրության համար, գործի սեփական ԶԼՄ-ի կամ աշխարհում ընդունված լրագրողական կանոնների սահմաններում: «Չկա որեւէ սրբություն, սկանդա՞լ ունես, գրիր այդ մասին ու ոչ մի պատասխանատվություն: Այստեղ բոլորդ ինքնախաբեությամբ եք տարված, ինչպես կյանքում, այնպես էլ ժուռնալիստիկայում չկա որեւէ սրբություն»,-ասաց նա: Նամիկի հայրտարարության հետ ներկա լրագրողները չհամաձայնեցին:
Գոհար ՀԱԿՈԲՅԱՆ
