ԱԺ աշխատակազմի ղեկավար Գուրգեն Դումանյանի հետ բանակցությունների արդյունքում քիչ առաջ ԱԺ-ի դիմաց հավաքված ու գազի սակագնի բարձրացման դեմ պայքարող հասարակական կազմակերպությունների հինգ ներկայացուցիչներին թույլ տվեցին մասնակցել գազի սակագնի վերաբերյալ ԱԺ-ում այս պահին ընթացող փակ նիստին:
Րոպեներ անց հ/կ ներկայացուցիչները դուրս եկան ԱԺ-ից: Իրավաբան Մերի Խաչատրյանը նախ հարցրեց ցուցարարներից՝ ով է զանգահարել իրեն: Նա պատմեց, որ երբ ԱԺ-ում էր, զանգ ստացավ, զանգի հեղինակը ներկայացել է ներքեւում սպասող ցուցարար եւ պնդել, որ ներքեւում սպասող ակտիվիստները միաբերան պահանջում են ներքեւ իջնել: ԱԺ-ից իջնող հ/կ ներկայացուցիչները նաեւ դժգոհեցին, որ իրենց ԱԺ էին տարել ոչ թե որպես քննարկման մասնակից, այլ՝ դիտորդ: Նրանց հատկացրել էին լրագրողների համար նախատեսված վայրը, որտեղից նրանք միայն կարող էին հետեւել քննարկմանը եւ դիրքորոշում հայտնելու հնարավորություն չէին ունենալու:
Ցուցարարների մի մասը քիչ առաջ հեռացավ, իսկ մյուս մասը շարունակում է սպասել ու դժգոհել գազի սակագնի բարձրացման նախաձեռնությունից՝ վանկարկելով թան-կա-ցում:
Մ. Խաչատրյանը նաեւ դժգոհեց ԱԺ հասարակայնության հետ կապերի բաժնի աշխատանքից՝ պնդելով, որ նրանք էին տարածել, թե փակ քննարկում է լինելու, իսկ վերեւում իրենք ոչ թե քննարկում, այլ նիստի անցկացում են տեսել:
Կարդացեք նաև
Արփինե ՍԻՄՈՆՅԱՆ
