Գագիկ Մակարյանի կարծիքով, «ՀայՌուսգազարդը» ոչ թե բարեգործություն է անում, այլ իր համար ավելի լավ պայմաններ է ստեղծում
Վերջերս Aravot.am-ի հետ զրույցում Գործատուների միության նախագահ Գագիկ Մակարյանն ասել էր, որ «ՀայՌուսգազարդը» 36-40% շահութաբերությամբ է աշխատում.« ուրեմն պետք չէ, որ իրենք ձգտեն իրենց այս շահութաբերությունն ամեն տարի պահպանել, թող մի քիչ էլ նվազեցնեն: Անկախ նրանից, թե այս երկրի էկոնոմիկան ոնց է փոխվում, իրենք ուզում են միշտ նույն շահութաբերությունն ունենալ: Իրենք էլ պետք է մյուսների նման նվազեցնեն, իջնեն 15-20-25%-ի: Ես գտնում եմ, որ հանձնաժողովում մենք բոլորս պետք է լրջորեն այս խնդիրը բարձրացնենք եւ թանկացմանը դեմ լինենք»:
Այսօր Aravot.am-ը Հանրային ծառայությունները կարգավորող հանձնաժողովի սակագնային քաղաքականության վարչության պետ Գարեգին Բաղրամյանից հետաքրքրվեց, թե որքան է կազմում «ՀայՌուսգազարդի» շահութաբերությունը, եւ արդյոք հնարավոր է այս ընկերության շահութաբերությունը նվազեցնել, ինչի հաշվին գազի գինը մի փոքր ավելի էժան կլինի:
Պարոն Բաղրամյանի խոսքերով` «Շահութաբերությունը հաշվարկվում է ըստ մեթոդաբանության ամբողջ իր կատարված ներդրումների վրա 10% հարկումից առաջ: Այսինքն` ընկերությունն իր դրած գումարի դիմաց ստանում է մաքուր 8%, եթե դուք նման բիզնես կանեիք Հայաստանում եւ փող կդնեիք, պատրաստ ենք ավելի նվազեցնել շահույթը, բայց դա այն մինիմալ շահույթի տոկոսն է, որն իր սակագնում ներառված է: Եթե ուսումնասիրենք մեր հայաստանյան շուկան` վարկերի եւ կապիտալի շուկան, թե ի՞նչ գումարով ու տոկոսով կարելի է վարկ վերցնել, կարելի է հասկանալ` դա նվազագույն թիվն է` 8%-ը կապիտալ ներդրումներ անելու համար»:
Կարդացեք նաև
«168 ժամ» թերթի լրագրող Բաբկեն Թունյանն էլ նկատեց, որ հայաստանյան պայմաններում դա ավելի շատ բարեգործության է նման:
Մանրամասն` տեսանյութում
Գագիկ Մակարյանն էլ թերահավատորեն մոտեցավ «ՀայՌուսգազարդի» ներկայացրած շուհութաբերության ցուցանիշին: Պարոն Մակարյանի խոսքերով` «Փաթեթում գրված է 9 միլիարդ դրամ, մոտ 25 միլիոն դոլար, եւ դա հանձնաժողովն է որոշում: Բայց կարծում եմ, որ մեզ «ՀայՌուսգազարդը» ոչ թե այդ թվով է խճճում, այլ այն բլոր հաշվարկներում, որոնք ներկայացրել է իր 790 էջանոց փաթեթում: Կարծում եմ նա շա¯տ ավելի պահեստային միջոցներ է գործարկում` տարբեր մոդեռնիզացիայի կամ կորուստների մեջ, այնտեղ կորուստների կատեգորիաներ կան, որոնց ստուգումը, հասանելիությունն ու թափանցիկությունը ստուգման կարիք ունի: Ես կարծում եմ «ՀայՌուսգազարդը իր համար ստեղծում է հնարավորություններ ավելի լավ պայմաններով աշխատելու համար»:
Նելլի ԲԱԲԱՅԱՆ
