Կրճատումը կատարվել է, սակայն որոշումը չկա
Նախկինում հայտնել ենք, որ մայիսի 15-ին Տավուշի մարզպետի որոշմամբ կրճատվել է Նոյեմբերյանի բժշկական կենտրոնի 28 աշխատակից: Կրճատման պատճառը բուժհիմնարկի ֆինանսական վատ վիճակը, ունեցած պարտքերն են: Կրճատված աշխատողները գրավոր բողոքով դիմել են մարդու իրավունքների պաշտպանի Իջեւանի գրասենյակ: Նոյեմբերյանի բժշկական կենտրոնի տնօրեն Աշոտ Գյոզալյանը մեզ հայտնել էր, որ կրճատված հաստիքների ցանկը հաստատվել է Տավուշի մարզպետարանում ստեղծված մասնագիտական խմբի կողմից: Մեր աղբյուրները հայտնեցին, որ մայիսի 22-ին կրճատված աշխատողներից 5 հոգի, մայիսի 23-ին եւս 5 հոգի հանվել են կրճատվածների ցուցակից: Այս տեղեկության հավաստիությունը ստուգելու համար զանգահարեցինք Տավուշի մարզպետարանի սոցապ եւ առողջապահության վարչության պետ Կարինե Դովլաթբեկյանին: Վերջինս ասաց,որ մեր հարցը գրավոր ուղարկենք մարզպետարանի լրատվության եւ հասարակայնության հետ կապերի բաժին: Զանգահարեցինք Նոյեմբերյանի բժշկական կենտրոնի տնօրեն Աշոտ Գյոզալյանին: Նա ասաց, որ ի սկզբանե կրճատվողները եղել են ոչ թե 28, այլ՝ 18 հոգի,որ այդ 28 թիվը ներառում է ֆիզիոլոգիական արձակուրդի մեջ գտնվողներին, նաեւ ընտանեկան բժշկի գործունեության ծավալած աշխատակցին: Տավուշի մարզպետ Արմեն Ղուլարյանի մայիսի 14-ի թիվ 52-Ա որոշումը, որի հիման վրա կրճատվել են Նոյեմբերյանի բժշկական կենտրոնի հաստիքները, մարզպետարանի ինտերնետային կայքում( www. Tavush. gov.am) տեղադրվել է առանց հավելվածի, ուր պետք է նշված լինեին կրճատվող հաստիքները: Այժմ թիվ 52-Ա որոշումն էլ է հանված մարզպետարանի կայքի «Իրավական ակտեր» բաժնից:
Ոսկան ՍԱՐԳՍՅԱՆ
