«Գյուղատնտեսությունը ամբողջ երկրում ամենառիսկային ոլորտն է, ռիսկերից են երաշտը, կարկուտը, ցրտահարումները, սերմերի անորակությունը: Կան շուրջ տասը ռիսկեր, որոնք ենթակա են ագրոապահովագրության»,-այս մասին այսօր «Նոյյան տապան» լրատվական կենտրոնում ասաց «Սոցիոմետր» անկախ սոցիոլոգիական կենտրոնի տնօրեն Ահարոն Ադիբեկյանը:
Բանախոսի փոխանցմամբ` պաշտոնական տվյալներով Հայաստանում կա 400 հազար գյուղատնտեսական տնտեսություն, որից գործում է միայն 200-250 հազարը, իսկ նրանց հիմնական սպառողը Երևանը, Գյումրին և Վանաձորն են: «Ունենք նաև երեք հարյուր պահածոյացման գործարաններ, բայց գործում են միայն մի քանի տասնյակը: Հայաստանն իրենից 7 աշխարհագրական գոտի է ներկայացնում և մեր երկիրը գտնվում է անապատային վտանգի տակ»,-ընդգծեց սոցիոլոգը:
Վերջինիս խոսքով` ռիսկից է կախված նաև գինը, համեմատական անցկացնելով բանանի և կեռասի միջև, որը տեղական արտադրության է:
Ահարոն Ադիբեկյանն ասուլիսի ընթացքում առաջարկով դիմեց ՀՀ վարչապետին` ստեղծել ագրոապահովագրությամբ զբաղվող հատուկ հանձնախումբ: Համաձայն «սոցիոմետր»-ի իրականացրած ուսումնասիրությունների` եթե 300.000 ֆերմերից տարեկան 20 դոլար հավաքվի և մուծվի որևէ ապահովագրական ընկերություն, պետությունն էլ իր հերթին ավելացնի 6 միլիոն դոլար, գյուղատնտեսական վնասների զգալի մասը հնարավոր կլինի փոխհատուցել: «Այս մասին ես դեռ 1999 թվականին էի բարձրաձայնել: Մեզ մոտ տարեկան վնասները չեն գերազանցում 1-2 մլն դոլարը, այսինքն՝ գումարների մի զգալի մասն ընկերությունը կծախսի իր ներքին ծախսերի համար, մի մասն էլ կլուծի գյուղատնտեսական զանազան խնդիրներ: Այն տնտեսությունները, որոնք կարողանան խուսափել ռիսկերից, ապա ևս պետք է ապահովագրվեն, որպես խրախուսանք»,-հավելելով, որ երկրում առկա ապահովագրական ընկերությունները չեն զբաղվում ագրոապահովագրությամբ, քանի որ ռիսկերը մեծ են:
Կարդացեք նաև
Նա միաժամանակ չհամաձայնեց վարչապետի այն հայտարարության հետ, որ գյուղացին պետք է վաճառի իր բերքն առանց միջնորդի, ասելով`«Դա կնվազեցնի աշխատանքի արդյունավետությունը: Նման բան աշխարհում չկա, միշտ միջնորդ է գտնվում»:
Քրիստինա ՄԻՐԶՈՅԱՆ
