Ամփոփելով փառատոնի արդյունքները՝ այսպիսի կարծիք հայտնեցին փառատոնի կազմակերպիչները
Օրերս ավարտված «Արտ-Ֆեստ» առաջին հանրապետական երիտասարդական փառատոնի մրցանակներն արդեն տրված են հաղթողներին, իսկ այսօր հերթը հասել էր փառատոնի կազմակերպիչներին ու մասնագիտական հանձնաժողովի մի քանի անդամներին՝ կիսվելու փառատոնից ստացած իրենց տպավորություններով:
«Արտ-Ֆեստ»-ի բացումից առաջ փառատոնի գեղարվեստական ղեկավար, ԵԹԿՊԻ ռեկտոր Արմեն Մազմանյանն ասել էր, որ փառատոնի հիմնական նպատակը մայրաքաղաքի եւ մարզերի արվեստով զբաղվող երիտասարդների միջեւ իրական կապ հաստատելն էր:
Այսօր, երբ փառատոնն արդեն ավարտված է, փառատոնի տնօրեն Էրիկ Բարսեղյանի խոսքով, իրենք հասել են իրենց նպատակին, այսինքն՝ փառատոնի միջոցով կապ է ստեղծվել մայրաքաղաքի ու մարզերի երիտասարդների միջեւ, ինչպես նաեւ ի հայտ են եկել տաղանդավոր երիտասարդներ, որոնք ապրում են մարզերում:
Կարդացեք նաև
ՀՀ վաստակավոր արտիստ, դերասան Ռաֆայել Քոթանջյանը, ով նույնպես ընդգրկված էր մասնագիտական հանձնախմբում, կարեւորեց այն փաստը, որ փառատոնը երիտասարդ ստեղծագործողներին ինքնարտահայտվելու հնարավորություն էր տվել:
«Այդ փորձն արվեց, եւ դա շատ գնահատելի է»,- ասաց դերասանը՝ հավելելով, որ
Ինքը կուզենար՝ հաջորդ փառատոների ընթացքում ավելի շատ մեծ թվով երիտասարդներ մասնակցեին:
Փառատոնի մասնագիտական հանձնախմբի անդամ Աննա Հեքեքյանը նկատեց, որ փառատոնը լավ էր կազմակերպված, եւ հանձնախմբի անդամների որոշումների վրա ոչ մի ճնշում չգործադրվեց:
«Մասնակիցները գտնվում էին հավասար դաշտում: Ոչ մի ճնշում չեղավ, ոչ մի ծանոթ-բարեկամ: Ընտրեցինք այն, ինչ պետք է ընտրեինք»,- ասաց Ա. Հեքեքյանը ու
նշեց, որ ինքը կուզեր՝ փառատոնի մրցանակակիրների ստեղծագործությունները ցուցադրվեն Հայաստանի հեռավոր մարզերում եւս:
Նկատենք, որ փառատոնում թատերական արվեստի ոլորտում «Ոսկե» մրցանակակիր չեղավ: Այս հանգամանքը տիկին Հեքեքյանը պատճառաբանեց նրանով, որ փառատոնին ներկայացված թատերական ներկայացումները այնքան էլ բարձր որակի չէին: Ըստ մասնագիտական հանձնախմբի անդամի, շատ կարեւոր է ավելի բարձր նշաձող սահմանել, որպեսզի երիտասարդները հետագայում ավելի լուրջ պատրաստվեն փառատոնին:
Իսկ ռեժիսոր Հայկ Օրդյանը, խոսելով փառատոնի կինոարվեստի ոլորտում ներկայացված գործերի մասին, նշեց, որ ինքը հաճելիորեն զարմացած է:
«Ինձ շատ հետաքրքիր անակնկալ էր սպասվում: Այսօր մարզերի երիտասարդները ոչնչով չեն տարբերվում մայրաքաղաքում ապրող երիտասարդներից»,- ասաց ռեժիսորը՝ նշելով, որ փառատոնին ներկայացված խաղարկային ֆիլմերն ավելի շատ էին:
Մասնագիտական հանձնախմբի անդամը նաեւ նկատեց, որ երիտասարդներն
երիտասարդական շնչով չեն ապրում:
Aravot.am-ը ռեժիսորից հետաքրքրվեց, թե ի՞նչ է նշանակում երիտասարդական շնչով չապրել:
Հ. Օրդյանը, խոստովանելով, որ պարզաբանումը երկար կտեւի, այնուամենայնիվ, ասաց. «Կյանքին նայելու այդ գունավոր երանգը ես չտեսա»:
Ըստ ռեժիսորի՝ երիտասարդները կյանքին նայում են 50 տարեկան մարդու աչքերով եւ իրենց խնդիրները չեն ներկայացնում երիտասարդական ոճով:
Աշոտ ԱԹԱՅԱՆ
