Արձագանք՝ հարցազրույցին
«Առավոտի» մայիսի 16-ի համարում տպագրված «Կառավարությունը պետք է հրաժարվի գիտական ներուժը օտարումից» վերնագրով հարցազրույցում ՅՈՒՆԵՍԿՕ-ի ամբիոնի պրոֆեսոր Սիներիկ Հայրապետյանը իրավացիորեն նշում է, որ ԲՈՀ-ը ստանձնել է խոտան գիտական աստիճաններ եւ կոչումներ շնորհող ֆաբրիկայի դեր: Մեր կողմից ավելացնենք, որ ԲՈՀ-ը տգիտության, կոռուպցիայի եւ զոռբայության օջախ է:
Եթե ԲՈՀ-ը տգիտության օջախ չլիներ, ապա ԵՊՀ Կենդանաբանության ամբիոնի դասախոս Է. Եղիազարյանին շինծու ատենախոսության համար երկու մասնագիտության գծով (կենդանաբանություն եւ էկոլոգիա) չեն շնորհի Կենսաբանական գիտությունների դոկտորի գիտական աստիճան:
Սկսած 2009թ.՝ 27-ից ավելի դիմում-բողոքներում, հրապարակված 9 հոդվածներում, որից 2-ը՝ «Առավոտ» թերթում, հայտարարել եմ, որ ԵՊՀ Կենսաբանության ամբիոնի դասախոս Է. Եղիազարյանը, չունենալով սեփական գիտական ուսումնասիրություններ, սակայն ունենալով դոկտոր դառնալու ախորժակ, հովանավորներ եւ միջոցներ, խարդախությունների, գրագողությունների ճանապարհով ստեղծել է շինծու ատենախոսություն եւ ԲՈՀ-ի 036 խորհրդում «պաշտպանել» այդ խոտանը եւ հասել իր ստոր նպատակին: Է. Եղիազարյանը ռուս կենսաբան Ա. Կուզմինի «իպՎվՏՉՏՊվօպ ոօՉՔպչՏ հհՀ» գրքից արտագրել է Հայաստանում տարածված յոթ տեսակի երկկենցաղների մասին գրված ամբողջ նյութը՝ 67 էջ (30-91 եւ 302-307): Առավել խայտառակություն է այն, որ գրագողը արտագրել է նաեւ նշված գրքի գրականության ցանկը, իսկ 6 էջ արտագրել է իմ եւ Ա. Հայրապետյանի հոդվածից: Ես ԲՈՀ-ի նախագահից խնդրել եմ ստեղծել հանձնաժողով, ջրի երես հանել կատարված խայտառակությունները եւ պատժել մղավորներին: Պրոֆեսոր Է. Գ. Յավրոյանի ղեկավարությամբ ստեղծված հանձնաժողովը 13.09.2012թ. ՀՀ ԳԱԱ-ին կից 035 մասնագիտացված խորհրդի նիստում հայտարարել է, որ պրոֆ. Լյուդվիգ Մելքումյանի կողմից ներկայացված փաստերը համապատասխանում են իրականությանը եւ Է. Եղիազարյանի աշխատանքը պետք է վերանայել, սակայն անտեսվել է այդ հանձնաժողովի որոշումը եւ կայացվել է այլ որոշում, որ թեեւ Ս. Կուզմինի գրքից փոխառնված (արտագրված) նյութերը ներկայացված են Է. Եղիազարյանի ատենախոսության 32-59, 62-91 էջերում, սակայն դրանից աշխատանքը չի կորցրել իր նշանակությունը, իսկ գրականության ցանկը արտագրելու եւ մյուս գրագողությունների փաստերը անտեսվել են:
Կարդացեք նաև
Ինձ ասում են, որ 90-ից ավելի մասնագետ դրական կարծիք է տվել այդ աշխատանքին: Իմ պատասխանը հետեւյալն է՝ գիտության համար կարեւորը ոչ թե հեղինակություններն են, այլ փաստերը: Այդ ինչպե՞ս է, որ շատ երկրներում բարձր պաշտոնյաներին գրագողության համար զրկում են իրենց պաշտոններից, իսկ մեզ մոտ նույնիսկ շարքային դասախոսին չեն պատժում:
ԼՅՈՒԴՎԻԳ ՄԵԼՔՈՒՄՅԱՆ
կենսաբանական գիտությունների
դոկտոր, պրոֆեսոր
Պատրաստ ենք տպագրել բոլոր կողմերի տեսակետները
«Առավոտ» օրաթերթ
