Այսօր լրագրողների հետ ճեպազրույցում հարցին՝ ինչո՞ւ Արմեն Երիցյանը հրաժարական չտվեց՝ հակակարկտային կայանների աշխատանքի պատճառով, պատիժներ ինչո՞ւ չեղան եւ հետո էլի ուզում եք հակակարկտային կայաններ ստեղծել, երբ որ դրանք ոչ մի բանի պիտանի չեղան՝ վարչապետ Տիգրան Սարգսյանը պատասխանեց. «Ձեր տեղեկատվությունը չի համապատասխանում իրականությանը, որովհետեւ այս տասը օրվա վերլուծությունները, մասնագետների եզրակացությունները, որ ստացել ենք՝ գյուղացիները համաձայն են, որ այս տիպի կարկուտի դեմ հակակարկտային կայանները ոչինչ անել չէին կարող: Այդպիսի կարկուտներ լինում են հազվադեպ: Այդպիսի ուժգնությամբ կարկուտների դեմ դրանք էֆեկտիվ չեն ոչ միայն Հայաստանում, այլեւ զարգացած երկրներում: Եթե կուտակումները կարկտային լինում են միջին ուժգնությամբ, ապա այս հակակարկտային կայանները 100 տոկոսով երաշխավորում են, որ կարկուտը վնաս չի պատճառի: Արմավիրցիները մեր առջեւ այս խնդիրը դրեցին եւ դրեցին շատ սուր, որպեսզի մենք երկրորդ շերտը կառուցենք, որովհետեւ նրանք ասում էին, որ անցած տարիների ընթացքում այդ հակակարկտային կայանները եղել են էֆեկտիվ: Մենք առաջնորդվում ենք մասնագետների մասնագիտական եզրակացություններով: Նախարարությունները իրենց պարտավորությունները ժամանակին կատարել են՝ ամբողջ ծավալով»:
Հռիփսիմե ՋԵԲԵՋՅԱՆ
