Գալուստ Սահակյանը ընդդիմությանը քննադատում է, որ չեն գնացել կարկուտը բռնել
Այսօր ԱԺ-ում կառավարության ծրագրի մասին ՀՀԿ խմբակցության տեսակետը ներկայացնելիս խմբակցության ղեկավար Գալուստ Սահակյանը խոսեց ընդդիմության ելույթների մասին:
Վահան Հովհաննիսյանը հեգնել էր, որ եթե դուք ամենալավն եք, էլի ինչի՞ եք ուզում մեր հետ համագործակցել: Գալուստ Սահակյանի խոսքերով՝ «Մենք ձեր կարիքը չունենք: Մենք ընդամենը ասում ենք՝ պատրաստ ենք համագործակցելու: Դուք պիտի մեր կարիքն ունենաք: Էլ չեն ասում՝ լավ, մարդկանց փողոցից բերեցինք էստեղ, որ էլի փողոցից խոսե՞ն: Էս Լեւոն Զուրաբյանը պատմության մեջ մնալու է: Առաջին նախագահին երկրորդական մարդ դարձրեց: Տրամաբանորեն բացիլային քաղաքականությամբ հիմա ուզում են ջերմություն ստեղծել ԱԺ-ում: Հլա որ էդքան խոսում եք, այ էս թիմը էստեղ նստած է, չի ուզում ինչ-որ բան ասել, բա որ հանկարծ էդքանը ուզենան միանգամից շշուկով խոսել, որտե՞ղ է լինելու քո խոսքը, մեր մոտեցումները: Էդ ակտիվ ձեւանալու քաղաքականությունը որտեղի՞ց: Ժողովուրդն ասում է՝ եթե հոգեվարքի մեջ ես՝ մենք բոլորս քո կողքը կանգնած ենք՝ էլ խռխռալդ ո՞րն է: Զրոյի կարգավիճակով գալ զրոյացնել ամբողջ մի իշխանությա՞ն, ամբողջ մի գոծընթացնե՞ր: Լուրջ կլինե՞ս գոնե մի պահ: Էդ որ էդքան խոսում, խոսում, խոսում եք, հլա մի հատ տեսեք դուք որտեղից եք եկել ու որտեղ եք գնում: Բարձրագոչ խոսալով, կառավարությանը դաս տալով, ռունգերը ուռացնելով՝ վերջում էլ ասել գիտեք, կառավարության ի՞նչ գործն է աշխատատեղը: Դրա համա՞ր եք բոլոր աշխատատեղերը վերացրել: Մխիթարանքը նա է, որ եթե այդպես չլիներ, երեւի ավելի վատ լիներ: Էլ էդպես չի լինելու: Սա կառավարության ծրագիր է, քաղաքականություն է, որտեղ բոլոր հարցադրումները կան: Այլ բան , որ դու դժգոհ ես: Ելույթներից հասկացա, որ կարկուտն ու գազն էլ…էնքան ջերմորեն եք խոսում, ոնց որ կպավ, էլի: Էլի խոսալու բան ունեք: Վարչապետը ներկայացնում է, թե ինչ է արվելու երկու ուղղություններով: Մարդիկ սկսել են հոխորտալով առաջարկել էն, ինչը վարչապետն է ասում, որ ժամ առաջ գնան ժողովրդի մոտ, ասեն՝ տեսա՞ք՝ ճնշեցինք հաղթեցինք: Տեսա՞ք ինչ արեցինք: Դե գնայիք կարկուտը բռնեիք: Փոխանակ մի առաջարկ անեք, փոխանակ մտածեք: Գոնե մի ժամանակ կար, որտեղ 3 մարդ էր հավաքվում, գնում կողքները կանգնում էիք: Էսօր էդ էլ չեք անում, որովհետեւ զրո եք: Զրոները ճանապարհ չունեն: Իսկ մեր թիմը նույն կերպ պիտի գնա, դուք՝ ձեր խոսքով, մենք՝ աշխատանքով: Կաշխատեք՝ կհամատեղենք մեր բոլորի ուժերը, չեք աշխատի՝ ուրեմն անաշխատունակ եք»:
Հաշվի առնելով, որ իր անունն է հնչել՝ Լեւոն Զուրաբյանը պնդեց, որ թույլ տան պատասխանել: Չնայած նրա խոսափողը շատ շուտ անջատեցին, բայց հասցրեց ասել. «Ինձ շատ դուր է գալիս այն հանգամանքը, որ դուք շատ նյարդայնացել եք, որ դուք տարիներ շարունակ սովոր եք նրան, որ գողանաք, ոչ ոք դրա մասին չխոսի, որ հաճույքով անեք դա: Դուք գողանալու եք, չարաշահելու եք եւ լսելու եք դրա մասին ամբողջ ճշմարտությունը»:
Կարդացեք նաև
Հռիփսիմե ՋԵԲԵՋՅԱՆ
