Այսօր Գյումրու նախկին քաղաքապետ Վարդան Ղուկասյանի դստեր փեսացու`Կարեն Եսայանի սպանության գործով դատավարությանը ներկայացել էր ընդամենը մեկ վկա` Կարեն Եսայանի հայրը` Ռազմիկ Եսայանը: Նա վերջերս էր վերադարձել ԱՄՆ-ից, իսկ դատակոչված մյուս վկաները, մասնավորապես Անիի նախկին ոստիկանապետի կինն ու դուստրը, ինչպես նաեւ Վարդան Ղուկասյանի ընտանքը` մեծ եղբայրը Գեւորգ Ղուկասյանը, նախկին քաղաքագլուխն ու նրա դուստրը` Մանյան դատարան չէին ներկայացել: Դատախազը միջնորդեց բերման ենթարկել նախկին ոստիկանապետի ընտանիքին, տուժողի շահերի պաշտպանն էլ իր հերթին ելույթ ունենալով հայտարարեց. «Միջնորդում ենք դատարանին` անկախ անուն –ազգանունից, սեռից, գույնից, մաշկի տեսակից բերման ենթարկել այն բոլոր վկաներին, ովքեր կհրաժարվեն դատարան ներկայանալ»: Այս միջնորդությանը միացավ նաեւ ամբաստանյալ Հարություն Սարգսյանի շահերի պաշտպան Լուսինե Սահակյանը, ով հետաքրքրվեց, թե ինչո՞ւ դատարանը բերման չի ենթարկում Գյումրու նախկին քաղաքապետի ընտանիքին: Դատավորն ասաց, որ նրանք դատարան են հրավիրվելու վաղը, եթե չգան , նոր բերման կենթարկեն: Փաստաբանը սակայն առարկեց`նշելով, որ դատարանը տեւական ժամանակ է` նույն պատասխանն է տալիս: Դատավոր Մարտին Սարոյանը փաստաբանին ներկայացրեց Ղուկասյանների գրավոր պատասխանը դատարանին, որով նրանք տեղեկացրել են, թե չեն կարող գալ դատարան ու առերեսվել նախկին ոստիկանապետի որդու` Հարություն Սարգսյանի հետ, վերջինս իրենց կգցի հոգեկան ծանր սթրեսի մեջ եւ խնդրել են դատարանին որպես հիմք ընդունել իրենց նախաքննական ցուցմունքները: Լուսինե Սահակյանը միջնորդեց դատարանին անմիջապես բերման ենթարկել նրանց, քանի որ նրանք առհասարակ են հրաժարվել դատարան ներկայանալ , եւ չեն գա նաեւ վաղը: Սակայն դատավորն ասաց, որ այդ հարցը կքննարկեն վաղը: Դատախազը Լուսինե Սահակյանից հետաքրքվեց, թե ինչո՞ւ դատարան չեն ներկայացել նախկին ոստիկանապետի կինն ու դուստրը: Փաստաբանը տեղեկացրեց , որ կնոջ ոտքը կոտրվել է, առողջությունը կտրուկ վատացել է, վաղը եւս չեն գա դատարան: Դատախազը միջնորդեց բերման ենթարկել դստերը: Դատարանը որոշեց վաղը բերման ենթարկել Անիի ոստիկանապետի դստերը `Մելանյա Սարգսյանին:
Նունե ԱՐԵՎՇԱՏՅԱՆ
