Այսօր այս մասին Շիրակի մարզի ընդհանուր իրավասության դատարանում ակնարկեց Անիի նախկին ոստիկանապետի որդու` Հարություն Սարգսյանի փաստաբան Լուսինե Սահակյանը: Հիշեցնենք, որ Հարություն Սարգսյանը մեղադրվում է Գյումրու նախկին քաղաքապետ Վարդան Ղուկասյանի դստեր փեսացու`27-ամյա Կարեն Եսայանի սպանության մեջ:
Իսկ Շիրակի մարզային ոստիկանապետ Կարեն Բաբակեխյանին դատարան որպես վկա հրավիրելու պատճառն այն է, որ սպանված Կարեն Եսայանի հայրը` Ռազմիկ Եսայանը, նրան գրավոր դիմում է հղել` հանցագործության մասին լրացուցիչ տեղեկություններ հայտնելով, որը սակայն դեռ անպատասխան է մնացել: Ռազմիկ Եսայանը ոստիկանապետին տեղեկացրել է, թե Հարություն Սարգսյանը, նստելով իր որդու մեքենան, նրա տարել-սպանել է, իսկ դեպքի վայրից մարդասպանին հետ է բերել Լյովա անունով մի անձնավորություն` «Ժիգուլի» մակնիշի մեքենայով: Այսօր ամբաստանյալի փաստաբան Լուսինե Սահակյանը Ռազմիկ Եսայանին հարցնում էր, թե որտեղի՞ց իրեն այդ տեղեկությունը: Ի պատասխան, վկան պնդում էր այդ մասին գնալ ու հետաքրքրվել մարզային ոստիկանապետից, քանի որ բոլոր տվյալները նրան է հաղորդել:
Կարդացեք նաև
Ըստ Ռազմիկ Եսայանի, ինքը չի կարող բարձրաձայնել այդ ամենը, քանի որ մտածում է մարդկային կյանքերի մասին: Լուսինե Սահակյանը դատարանին միջնորդեց դռնփակ դատական նիստ անցկացնել , քանի որ Ռազմիկ Եսայանի վկայությունը կարող է բացահայտել իրական հանցագործներին, սակայն դատարանը մերժեց :Լուսինե Սահակյանը դատարանին հայտնեց, որ իր հաջորդ միջնորդությունը լինելու է Կարեն Բաբակեխյանին դատարան հրավիրելը: Նշենք, որ Կարեն Եսայանի հայրը Լուսինե Սահակյանին ասում էր . «Հարգելի Լուսինե, ես իմացել եմ, որ դուք պրոֆեսիոնալ փաստաբան եք, բայց իզուր եք փորձում արդարացնել մարդասպանին, դա ձեզ չի հաջողվելու»:Լուսինե Սահակայնն էլ պատասխանեց, որ եթե պարզվի իր պաշտպանյալը առնչություն ունի մարդասպանության հետ, անմիջապես կհրաժարվի նրա շահերը պաշտպանելուց: «Ես ասում եմ առնչություն», -շեշտեց Լուսինե Սահակյանը:
Այուհետ վկային սկսեց հարցեր տալ ամբաստանյալ Հարություն Սարգսյանը : Վերջինս հարցրեց. «Դուք պնդում եք, որ ե՞ս եմ ձեր տղային սպանել, նա ի՞նչ էր արել ինձ, որ սպանեի»: Ռազմիկ Եսայանն ասաց. «Դու պիտի պատասխանես քո հարցին, երեւի վատ էիր զգացել, որ աղջկան չեն տվել»: « Իսկ ո՞վ է ասել Ձեզ, որ ես ձեր հարսի հետ ամուսնանալու մտադրություն եմ ունեցել, ես շփվե՞լ եմ, ճանաչե՞լ եմ ձեր հարսին», շարունակեց ամբաստանյալը: «Հարցն էն ,որ դու 100 մետրի վրա ռիսկ չես արել մոտենալ Մանյային, մեքենայի միջից ես հետեւել», պատասխանեց վկան: «Մանյայն ո՞վ է»,-արձագանքեց ամաբաստանյալը`շարունակելով . «Եթե ես չեմ ճանաչում, ի՞նչ խանդ են բերել-դրել, Թումանյանի հեքիաթն է» : Այնուհետ ամբաստանյալը հայտարարեց, որ վկան սուտ է խոսում` մեջբերելով իր հետ ոստիկանությունում ունեցած զրույցից հատվածներ: «Դե երդում կեր տղայիդ գերեզմանով, որ ես էդպիսի բան եմ ասել»,- առաջարկեց Հարություն Սարգսյանը, որն էլ առիթ դարձավ վիճաբանության, ճչոցների, փոխադարձ անարգանքի, տեղից բարձրանալով ամբաստանյալից պատիվ էր պահանջում նաեւ Կարեն Եսայանի մայրը : Երկար ժամանակ դատական նիստը շարունակել չէր հաջողվում:
Վիճաբանաության առիթ դարձավ նաեւ այն, որ ամբաստանյալը ակնարկում էր, թե տուժող կողմը 12 միլիոն դրամ գումար է պահանջել: «Ես քաղհայց եմ ներկայացրել, բա ի՞նչ պիտի անեի, ի՞նչ եք ձեզ թույլ տալիս ուրիշ բան դարձնելու, մարդ էս աստիճանի լկտի չի կարող լինել», տեղից բացականչեց Կարեն Եսայանի մայրը` Անահիտ Իսկանդարյանը: Ամբաստանյալը իր հերթին էր ճչում , թե մարդասպանը Ռազմիկ Եսայանն ու նրա կինն են, ինքը կապ չունի մարդասպանության հետ ու խորհուրդ էր տալիս գտնել իրական մարդասպանին: «Ձենդ ճիճու, տղուս թափած ամեն կաթիլ արյան համար պատասխան պիտի տաս, դու նրա ոտքի տակի ցեխը չարժեիր»- շշպռում էր Ռազմիկ Եսայանը: Դատական նիստի ավարտին բոլորը` այդ թվում եւ դատավոր Մարտին Սարոյանը արդեն գերհոգնած էին, վատացած: Նիստը կշարունակվի վաղը:
Նունե ԱՐԵՎՇԱՏՅԱՆ
