1977 թվականից բացված տուն-թանգարանի հիմնանորոգումն անընդհատ հետաձգվում է
«Մնում է, որ մեր պետական այրերը ընտրություն կատարեն՝ իրենց համար Դեմիրճյանի արձանն ու տուն-թանգարա՞նն է ավելի կարեւոր, թե՞ 200 դրամով վաճառվող կարկանդակը»,- «Առավոտի» հետ զրույցում ասում է Դ. Դեմիրճյանի տուն-թանգարանի վարիչ Կարինե Ռաֆայելյանը:
Աբովյան 29 հասցեում գտնվող Դերենիկ Դեմիրճյանի տուն-թանգարան առաջին անգամ այցելողները նախեւառաջ կնկատեն տուն-թանգարանի մուտքի մոտ տեղադրված հարակից տարածքում գործող գրավատան մեծ չափերով ցուցանակը:
Գրողի տուն-թանգարան առաջին անգամ այցելողները հավանաբար կհանդիպեն եւս մեկ խոչընդոտի՝ ինչպե՞ս գտնել տուն-թանգարանը:
«Շատ դժվար են գտնում տեղը: Մենք ստիպված ենք լինում գնալ «Երիտասարդական» մետրոյի մոտից դիմավորել մեր այցելուներին»,- պատմեց տիկին Ռաֆայելյանը: Տուն-թանգարանի առաջին այցելուի աչքից հաստատ չեն վրիպի նաեւ տուն-թանգարանի պատերի ճաքերն ու շենքի ավելի բարձր հարկերում ապրող բնակիչների տներից հոսած ջրերի հետքերը:
«2006-ից ասում էին՝ հաջորդ տարի, հաջորդ տարի: Այս տարի ինձ արդեն չեն ասում, թե որոշակի երբ կլինի: Այստեղ խնդիրն այն է, որ տուն-թանգարանը մասնաճյուղ է եւ ուղղակի չի ֆինանսավորվում: Հավանաբար միջոցները սուղ են, չեն պատկերացնում՝ առաջիկայում երբ հնարավոր կլինի գումար հատկացնել հենց այս թանգարանին: Այստեղ խնդիրները բարդացել են, որովհետեւ տարիներ, տաս-նամյակներ շարունակ կուտակվել են իրար վրա եւ չեն լուծվել»,- մեր զրուցակիցն այսպես բացատրեց 1977 թվականից բացված տուն-թանգարանի հիմնանորոգման հետաձգումը:
Տուն-թանգարանի վարիչը հավելեց, որ, այնուամենայնիվ, մասնակի վերանորոգում տուն-թանգարանում մի քանի անգամ եղել է. «Հատկացումներ լինում են: Մասնակի վերանորոգումներ էլ: Արվում է ծայրահեղ անհրաժեշտը: Մենք մի քանի ամիս առաջ մասնակիորեն ջրագիծն ու հոսանքի գծերն ենք նորոգել: Բայց այդքան կարկատան անել կլինի՞»:
Չնայած խնդիրներին՝ տուն-թանգարանի ղեկավարությունը դեպի ապագա ձգվող ծրագրեր ունի:
«Պետք է տուն-թանգարանի առջեւի տարածքն ազատվի, ու Դեմիրճյանի արձանը դրվի: Այստեղ արձան կանգնեցնելու մասին քաղաքապետի որոշումն արդեն կա: Մենք մտածում ենք, որ արձանը պետք է լինի ներկայիս հուշասյան տեղում, իսկ հուշասյունն ուզում ենք տեղադրել այն երկու ծառերի արանքում, որոնք իր ձեռքով տնկել է Դեմիրճյանը»,- ասաց տուն-թանգարանի վարիչը:
ԱՇՈՏ ԱԹԱՅԱՆ
«Առավոտ» օրաթերթ
