Շատ ընթերցասերներ գուցե նախանձեին Վահե Ղուկասյանին, քանի որ նա աշխատում է Մաշտոցի պողոտայում գտնվող «Գրքերի աշխարհ» գրախանութում:
Գրախանութի մշտական այցելուները անկասկած նկատած կլինեն Վահեին, ում համարյա միշտ կարելի է գտնել գրախանութի ինչ-որ անկյունում՝ գիրքը ձեռքին:
«Ոնց որ պոնչիկանոցում աշխատողը պոնչիկ չուտի»,- Aravot.am-ի հետ զրույցում նա այսպիսի բնորոշում տվեց իր կարդալուն:
Արդեն երկու տարի է, ինչ Վահեն աշխատում է գրախանութում, եւ այդ ընթացքում, ինչպես նշեց մեր զրուցակիցը, միշտ էլ կարդալու բան է գտել այնտեղ:
Կարդացեք նաև
«Օր կա քիթ սրբելու ժամանակ չի լինում, ինչ մնա՝ գիրք կարդալուն: Եթե գալիս ինչ-որ գիրք շատ են հարցնում, ինձ էլ է սկսում հետաքրքրել էդ գիրքը, վերցնում-կարդում եմ»,- նշեց գրախանութի աշխատակիցը՝ պնդելով, որ գիրք ընտրելու կոնկրետ ձեւ չունի, ու նաեւ հաշվի առնելով գրախանութի աշխատակցի իր պարտականությունները ՝ գրախանութում գիրք կարդալը դանդաղ է ստացվում:
Մասնագիտությամբ արեւելագետ Վահեին ավելի շատ հետաքրքրում է գրականության ֆանտաստիկայի ժանրը: Հենց այս նույն ժանրի մեջ էլ փորձում է գրել:
Վահեի խոսքով՝ իր գործերը կամ տպվում են թերթերում կամ տեղադրվում են բլոգում:
Aravot.am-ը նրանից հետաքրքրվեց, թե արդյոք ճի՞շտ է մեծահասակների այն պնդումը, որ երիտասարդները գիրք չեն կարդում:
«Այդպես չեմ կարծում, որովհետեւ կան գրողներ, որոնց փորձում են մոդայիկ դարձնել: Հայ ժամանակակից գրականության մեջ էլ կան այդպիսի հեղինակներ, որոնց գործերը կարդում են երիտասարդները»:
Սակայն Վահեի կարծիքով, հայ ժամանակակից գրականությունը հիմնված է որոշակի թեմաների վրա, եւ երկու տարբեր գրողների գործերը հաճախ նույն թեմատիկ բնույթն ունեն:
Նշենք նաեւ, որ աշխարհի շատ հայտնի գրողներ իրենց կյանքի տարբեր ժամանակահատվածներում աշխատել են գրախանութներում ու գրադարաններում:
Աշոտ ԱԹԱՅԱՆ
Լուսանկարը՝ Վահե Ղուկասյանի ֆեյսբուքյան էջից
