Այսօր ԱԺ նիստի սկզբում քվեարկության դրվեց «Ժառանգության» հեղինակած Ընտրական օրենսգրքում փոփոխություն կատարելու նախագիծը: Այն չընդունվեց 41 կողմ, 66 դեմ եւ 1 ձեռնպահ քվեարկության արդյունքներով:
Մինչ քվեարկությունը ՀՀԿ խմբակցության ղեկավար Գալուստ Սահակյանը հայտարարեց, որ այդ օրինագիծը մեկ տարի է՝ քննարկվում է եւ արդեն պարզ է իրենց դիրքորոշումը՝ ՀՀԿ-ն դեմ է քվեարկելու:
ՕԵԿ խմբակցության ղեկավար Հեղինե Բիշարյանն էլ առաջարկեց, որ հետաձգվի քվեարկությունը, օրինագծի վրա միասին աշխատեն, նոր դնեն քվեարկության, սակայն նրա առաջարկը մնաց անպատասխան:
ԱԺ նախագահ Հովիկ Աբրահամյանին դիմեց ՀՀԿ պատգամավոր Վահրամ Բաղդասարյանը: Նա կոչ արեց չհանդուրժել եւ այլեւս թույլ չտալ, որ որոշ մարդիկ վիրավորեն գործադիր իշխանությանը, անվանեն խաբեբա, խարդախ: Հիշեցնենք, որ երեկ Զարուհի Փոստանջյանն այդպես էր անվանել գլխավոր դատախազ Աղվան Հովսեփյանին: Լեւոն Զուրաբյանն էլ իշխանությանը կոչել էր անբարոյական: Վահրամ Բաղդասարյանի խոսքերով՝ «Շատ ցավալի է, որ անբարոյականները խոսում են բարոյականության մասին եւ ճշմարտության մասին: Եթե կա անբավարարություն, ԱԺ-ն բավարարվելու տեղ չի: Խնդրում եմ կարգի հրավիրել նրանց»:
Կարդացեք նաև
Հռիփսիմե ՋԵԲԵՋՅԱՆ
