«Մեր առջև դրված նպատակներից կարևորն այն է, որ որևէ կերպ քաղաքական միություն չստեղծենք: Պատմական այս տարածաշրջանի համար դա մի տեսակ ֆոբիա է… բայց մեզ հարկավոր է ստեղծել լիարժեք տնտեսական միություն, որը թույլ կտա մեզ ամրապնդել մեր տնտեսությունը ու միևնույն ժամանակ նոր գլոբալ տնտեսության տեղ զբաղեցնել: Եվ ես ավելի քան վստահ եմ, որ այդ նոր գլոբալ տնտեսությունը կայացնելու են ոչ թե 200 պետություններ, այլ 20 տարածաշրջանային ալյանսներ, որոնք այսօր արդեն ձևավորվում են»,- Մոսկվայում գտնվող հայ լրագրողների հետ հանդիպման ժամանակ հայտարարեց Եվրասիական տնտեսական հանձնաժողովի ինտեգրման և մակրոտնտեսության հիմնական ուղղությունների նախարար Տատյանա Վալովայան` խոսելով Եվրասիական տնտեսական միության հեռանկարների մասին: Հիշեցնոնք, որ հայ լրագրողները Մոսկվայում են գտնվում «Ինտեգրացիա եւ զարգացում» հետազոտության եւ վերլուծության հասարակական կազմակերպության նախաձեռնությամբ: Նախարարը նկատեց, որ անգամ հզոր Ռուսաստանը, նույնիսկ ԱՄՆ-ը չեն կարող միայնակ հայտարարել իրենց մասին համաշխարհային ասպարեզում. «Այդ իսկ պատճառով մենք այսօր ոչ մի կերպ չենք խոսում քաղաքական միության ձևավորման մասին և միության արտաքին քաղաքական ուղղվածության մասին: Մենք անգամ չենք մտածում այդ մասին քննարկումներ անցկացնել, որովհետև արտաքին քաղաքականության հարցերը բոլորս միասին քննարկում ենք ՄԱԿ–ում և ես հույս ունեմ, որ այդ մակարդակին էլ կմնա»: Ռուսաստանցի պաշտոնյան հավաստիացնում է, որ Մաքսային միության նախաձեռնությունը բացառապես տնտեսական նշանակություն ունի:
Տատյանա Վալովայան նշեց նաև, որ նախաձեռնության հեղինակ երկիրն իր առջև խնդիր չի դրել բանակցել ինչ-որ երկրների հետ` Եվրասիական տնտեսական միությանը միանալու համար: Դա իրենց պետք չէ եւ ոչ էլ ձեռնտու է: Ասաց, որ իրենք ելնում են նրանից, թե ԱՊՀ երկրներից որևէ մեկը որոշակի հետաքրքրություն է ցուցաբերում հարցի վերաբերյալ: Այս առումով նա նկատեց, որ ժամանակի ընթացքում Հայաստանի հետաքրքրությունը վերածվեց նրան, որ մեր պետությունը դիտորդի կարգավիճակով մտավ Եվրասիական տնտեսական միություն: Իսկ ահա Վրաստանն ու Ադրբեջանը նման հետաքրքրություն չեն արտահայտել և Ռուսաստանն էլ, շեշտեց պաշտոնյան, դրան ըմբռնումով է մոտենում:
Անդրադառնալով դիտարկմանը, թե շատ են հնչում կարծիքներ, որ այս գաղափարի վերջնարդյունքն ի վերջո լինելու է խորհրդային միության վերածնունդը, Տատյանա Վալովայան ընդգծեց` ոչ ոք, առավել ևս Ռուսաստանում, նման նպատակ իր առջեւ չի դնում. «Եթե որևէ մեկը երբևիցէ հայտարարի, թե ցանկանում է Եվրասիական տնտեսական միության հիմքի վրա ստեղծել խորհրդային միություն, ապա կկորցնի նախևառաջ ՌԴ-ի աջակցությունը: Կարծում եմ, դա արհեստականորեն է արվում, որպեսզի նման տրամադրություններ լինեն, քանի որ մարդիկ շատ լավ գիտակցում են, որ ինչ արվում է, ճիշտ է արվում և գաղափարը շատ կարևոր է տնտեսության տեսանկյունից»:
Հայկական ԶԼՄ-ների ղեկավարներն ու լրագրողները այցի առաջին օրը այցելեցին նաեւ «ՐԻԱ Նովոստի» և «ԻՏԱՐ ՏԱՍՍ» պետական գործակալություններ:
Կարդացեք նաև
Նելլի ԳՐԻԳՈՐՅԱՆ
Մոսկվա
