Մարդու իրավունքների պաշտպանի գրասենյակը (ՄԻՊ) այս պահին փորձում է ճշտել զորամասում սպանված զինծառայող Լյուքս Ստեփանյանի դին Երեւան տեղափոխելու ճանապարհին սպանվածի հարազատներին ծեծի ենթարկելու տեղեկատվությունը:
ՄԻՊ Կարեն Անդրեասյանը Aravot.am-ին ասաց, որ դեռեւս դիմում –բողոք պետական մարմնի ոչ իրավաչափ գործողությունների վերաբերյալ չեն ստացել:
Անդրադառնալով նախաքննության փուլում, նախարար Սեյրան Օհանյանի եւ այլ պաշտոնյաների կողմից դեպքի վերաբերյալ մեկնաբանություններ ու վարկածներ տարածելուն, պարոն Անդրեասյանն ասաց. «Եթե ելնենք կոռեկտության տեսանկյունից, արդարադատության լավագույն շահն է համարվում, երբ ընդհանրապես վարկածներ, մեկնաբանություններ չեն շրջանառվում,: Բայց մեր հասարակությունը ոչ միայն այս, այլեւ հազարավոր այլ գործերով երբեք այդ զսպվածությունը չի դրսեւորել եւ ցանկացած գործով էլ հնչել են կարծիքներ, վարկածներ եւ մեկնաբանություններ: Եվ հիմա այս գործով ասել, որ կարող է ազդել նախաքննության վրա, խիստ կասկածում եմ: Մեր իրավապահ մարմինները հաճախ վստահություն արդարացիորեն չեն ներշնչում , թերեւս արդար քննություն ունենալու միակ ձեւը հասարակության բոլոր կողմերի ակտիվ միջամտությունն է ամեն կարեւոր գործի: Մենք էլ ունենք որոշակի տեղեկատվություն, բայց չենք միջամտում նախաքննությանը եւ սպասում ենք արդյունքներին, կտեսնենք` ինչպես կվարեն այդ քննությունը»:
Պարոն Անդրեասյանի գնահատմամբ, դին Երեւան բերելու քայլում կա հակաիրավական գործողություն. «Փակել հրապարակը բարոյական ճնշում է բոլորիս վրա: Բայց ես զավեշտալի եմ համարում, երբ փորձ են անում ծնողների տարրական, արտառոց եւ թերեւս անընդունելի ճանապարոհվ պայքարը բարդել իրավապաշտպանների վրա: Եթե մեղավորներ են պետք նման դեպքի համար, որ պարզեն` ինչու են ուզում ծնողները նման քայլ անել, կմեղադրեի վերջին քսան ամյակում իրավապահ մարմինների գործեալոճին, որից հետո ցանկացած մարդ, որը կորուստ է ունենում, փոխարենը սպասի արդար քննիչի, արդար դատավորի , արդար դատախազի որոշմանը, ստիպված է լինում տարբեր ձեւերով, նույնիսկ ամենաանընդունելի ձեւով սեփական վիշտը, սեփական արդարության պահանջը բարձրաձայնել: Այստեղ մեղավորը ոչ թե կողքից ինչ–որ մարդիկ են, որոնք կարող են թեկուզ սխալ խորհուրդներ տալ , այլ մեղավոր է իրավապահ այն համակարգը, որը վստահություն չի ներշնչում եւ ստիպում է մարդկանց դուրս գալ փողոցներ»:
Կարդացեք նաև
Արփինե ՍԻՄՈՆՅԱՆ
