Գազի գնի թանկացման լուրերը մտահոգությունների տեղիք են տվել վանաձորցիներին:
Առաջիկայում գազի գնի հնարավոր թանկացման մասին շրջանառվող լուրերը մտահոգությունների տեղիք են տվել ոչ միայն հասարակության լայն շրջանակներին, այլեւ Վանաձորում բնակվող Սարիբեկյանների ընտանիքին:
3 անձից բաղկացած ընտանիքի միակ եկամուտը դստեր ամսական աշխատավարձն է, որը հազիվ կոմունալ վճարումների է բավականացնում, մնացածով էլ այդ ամսվա ուտելիքի ծախսերն են հոգում:
«Հիմա եթե գազը թանկանա, միայն կոմունալի կհերիքի, ուտելիքի հարցն էլ չգիտեմ` ոնց ենք լուծելու»,-Aravot.am-ի հետ զրույցում նկատում է Արմինե Սարիբեկյանը:
Կարդացեք նաև
Շրջանառվող լուրերի համաձայն` «ՀայՌուսգազարդ» ընկերությունը դիմել էր Հանրային ծառայությունները կարգավորող հանձնաժողովին` առաջարկելով շուրջ 67 տոկոսով բարձրացնել գազի սակագինը` հազար խորանարդ մետրի համար ներկայիս 132 հազար դրամը դարձնելով 221 հազար դրամ:
«Սպանում են, էլի, ժողովրդին, ինչի, օրինակ, Վրաստանում գազը, հացը էժանանում է, իսկ մեզ մոտ հակառակն է, սենց որ մնա, Հայաստանում էլ մարդ չի ապրի, թալանում են ժողովրդին»,-ասում է մեկ այլ բնակչուհի` Գայանե Վարդանյանը:
Համաձայն պաշտոնական տվյալների` 2013 թվականի ապրիլի 1-ի դրությամբ Լոռու մարզում աշխատանք է փնտրում 9131 մարդ:
Մարզում գործազրկության մակարդակը 8 տոկոս է:
Անուշ ԲՈՒԼՂԱԴԱՐՅԱՆ
