Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Ալեքսեյ Սուքոյանի վարույթում է գտնվում երաժիշտ Սեդրակ Հովհաննիսյանի հայցն ընդդեմ երաժիշտ Հասմիկ Մանասերյանի, երրորդ անձ ՝ «Առավոտ» օրաթերթի՝ պատվին, արժանապատվությանն ու գործարար համբավին պատճառված վնասի հատուցման մասին հայցը:
Մայիսի 14-ին նշանակվել էր նախնական նիստ, որից հետո դատարանն անցել է դատաքննության փուլի: «Առավոտը» չի մասնակցել նախնական դատական նիստին՝ կապված իր ներկայացուցչի հետ:
Դատաքննությունը նշանակվել է հունիսի 17-ին:
Հիշեցնենք, որ կլարնետահար Սեդրակ Հովհաննիսյանը հայտնել է, որ գրել է 65-ից ավելի երգեր, մի շարք «երգերի երաժշտություն», սակայն, ըստ նրա, իր ստեղծագործությունները «շատանալու» փոխարեն «պակասել են», քանի որ նրանցից մի քանիսը ՝ 8-ը «գրագողության առարկա են դարձել»:
Կարդացեք նաև
Հայցվորը մինչ այդ դիմել էր Կենտրոն եւ Նորք-մարաշ վարչական շրջանների ընդհանուր իրավասության դատարան, վերոհիշյալ 8 ստեղծագործությունների նկատմամբ հեղինակային իրավունքի ճանաչման պահանջով:
«Առավոտը» այս տարվա փետրվարի 14-ին «Հայցվորի փաստաբանը՝ Հ.Մանասերյանին գրագող անվանեց, իսկ Հ.Մանասերյանը հայցվորին՝ խելքդ գցած», հրապարակմամբ անդրադարձել է սույն վեճին:
Հայցվորը պահանջում է պատասխանողներին պարտավորեցնել, առաջին էջում հերքել Ս.Հովհաննիսյանի վերաբերյալ հրապարակված վիրավորանք եւ զրպարտություն հանդիսացող փաստացի տվյալները, որպես փոխհատուցում վճարել նվազագույն աշխատավարձի 1000-ապատիկի չափով 1.000.000 ՀՀ դրամ՝ վիրավորանքի, նվազագույն աշխատավարձի՝ 500 000 ՀՀ դրամի՝ զրպարտանքի համար եւ փաստաբանի վարձատրության գումարը՝ 120 000 դրամի չափով:
Պատասխանող Հասմիկ Մանասերյանի ներկայացուցիչ Արմեն Բաղդասարյանը ներկայացրել է 9 էջից բաղկացած առարկություններ:
Համաձայն այդ առարկությունների, հայցն անհիմն է եւ ենթակա է ամբողջությամբ մերժման:
Պատասխանողը հայցվորից պահանջել է հստակեցնել, թե «Պատասխանողներից ո՞վ է հանդիսանում պատասխանող վիրավորանքի, ով՝ զրպարտության համար»:
Հասմիկ Մանասերյանի ներկայացուցիչ Արմեն Բաղդասարյանը ուշադրություն է հրավիրել նաեւ «գործարար համբավ»- հանգամանքի վրա: Ըստ նրա «հայցվորը չունի գործարար համբավ, քանի որ գործարար համբավը բնորոշ է իրավաբանական անձանց եւ անհատ ձեռնարկատերերին: Որքան հայտնի է, Սեդրակ Հովհաննիսյանը չի կարող օգտվել գործարար համբավի պաշտպանությունից ՝ իրավաբանական անձ կամ անհատ ձեռնարկատեր չլինելու պատճառաբանությամբ»:
Պատասխանողը հղում է կատարել ՀՀ քաղաքացիական օրենսգրքի 19 հոդվածի 2-րդ կետին , համաձայն որի, անձի պատիվը, արժանապատվությունը, գործարար համբավը ենթակա են պաշտպանության այլ անձի կողմից հրապարակայնորեն արտահայտված վիրավորանքից եւ զրպարտությունից օրենքով սահմանված կարգով:
Նախնական պայմանավորվածության համաձայն, դատաքննության ժամանակ «Առավոտի» ներկայացուցիչը կլինի ՀՀ փաստաբանների պալատի անդամ Գեւորգ Գյոզալյանը:
Ռուզան ՄԻՆԱՍՅԱՆ
