Ապրիլի 26-29-ը Ռուսաստանի Սանկտ-Պետերբուրգ քաղաքում կայացած «Ֆոլկլյորից մինչեւ մոդեռն» պարի միջազգային փառատոն-մրցույթից պետական «Բարեկամություն» համույթը վերադարձել է «Գրան-Պրի» մրցանակով:
Համույթի տնօրեն Տիգրան Մխոյանը, լրագրողների հետ կիսվելով փառատոնից ստացած տպավորություններով, ինչպես նաեւ խոսելով անցկացման ու մրցանակների շնորհման մասին՝ ասաց.
«Մասնակցեցինք, հաղթեցինք եւ վերադարձանք: Մասնակցում էին տարբեր երկրներից ժամանած թվով 34 խմբեր»:
«Մենք ազգագրական պարերով ներկայացանք: «Աշխարհումս» պարը ներկայացրեցինք: Երկրորդ փուլում ներկայացանք Նորայր Մեհրաբյանի շատ ազդեցիկ գործով»,- ավելացրեց համույթի հիմնադիր-պարող Աննա Բադալյանը:
Կարդացեք նաև
Aravot.am-ը «Բարեկամություն» համույթի ներկայացուցիչներից հետաքրքրվեց, թե ինչպե՞ս կազդի հաղթանակը համույթի հետագա գործունեության վրա:
Աննա Բադալյանը պատասխանեց.
«Այսօր «Բարեկամություն» անսամբլը համարվում է մի բարձր կետ, որին բոլոր աղջիկներն ու տղաները ձգտում են: Եվ կարծում եմ, որ այս մրցանակը նաեւ մի նոր գույն բերեց մեր անսամբլին»:
Մենք նաեւ հետաքրքրվեցինք, թե արդյոք «Գրան-Պրի» մրցանակը ենթադրո՞ւմ է ֆինանսական ինչ-որ մաս:
Համույթի տնօրեն Տ.Մխոյանը պատասխանեց.
«Կա ֆինանսական մաս, դա մոտավորապես հազար դոլարի չափի գումար է: Մեր խմբի համար փոքր գումար է, ավելի շատ՝ սիմվոլիկ»:
Աշոտ ԱԹԱՅԱՆ
