«Ես նոր կառավարություն չեմ տեսնում: Տեսնում եմ նույն կառավարությունը: Կոսմետիկ փոփոխություններով մեր խնդիրները չեն լուծվի: Կարծում եմ՝ եթե այն ժամանակ էլ կառավարությունը ցանկանար, կարող էր շատ խնդիրներ լուծել: Չեն ցանկացել: Հիմա էլ այդ կարծիքին եմ ու չեմ հավատում, որ իրենք ցանկանում են խնդիրներ լուծել»,- «Առավոտի» հետ զրույցում ասաց «Ազատ դեմոկրատներ» կուսակցության նախագահ Խաչատուր Քոքոբելյանը՝ անդրադառնալով կառավարության կազմին եւ ծրագրին: «Հայաստանում չկա մի մարդ, ով չցանկանա ապահով եւ անվտանգ Հայաստան: Խնդիրն այն է, թե ով ինչպես է դա պատկերացնում: Եթե կան մարդիկ, ովքեր դա անելու հնարավորություն չունեն, կառավարությունն ունի եւ որոշումներ կայացնելու, եւ դրանք իրականացնելու իրավասություններ ու մեխանիզմներ: Ո՞վ էր իրենց ձեռքը բռնել այն ժամանակ եւ ո՞վ է բռնել այժմ: Հայաստանում տնտեսությունը վերականգնելը եւ հզորացնելը տարիների խնդիր է, բայց սոցիալական անարդարությունները եւ այդ մթնոլորտը վերացնելը՝ օրերի խնդիր: Դժբախտաբար, ՀՀ քաղաքացիները երբեք կառավարության հետ հույսեր չեն կապել, եւ այս սոսկալի արտագաղթի պատճառներից մեկը հենց դա է»:
«Առավոտ» օրաթերթ
