Բարձրաստիճան պաշտոնատար անձանց էթիկայի հանձնաժողովը պարզել է, որ «Թրանսփարենսի Ինթերնեշնլ հակակոռուպցիոն կենտրոն» հ/կ-ի ներկայացրած 10 ընկերություններից ՊԵԿ նախագահ Գագիկ Խաչատրյանը ինչ-որ առումով կապ ունի միայն վեցի հետ:
«Մեգամոթորս» եւ «Ապէէրոն» ընկերությունների բաժնետերերը Գ. Խաչատրյանի զավակներն են , «Մեգաֆուդ», « Յուքոմ» եւ «Խրոնոգրաֆ» ընկերությունների բաժնետերերը ՊԵԿ նախագահի հորաքրոջ եւ հորեղբոր զավակներն են:
Հանձնաժողովը, մեկ տարի շարունակ քննելով «Թրանսփարենսի Ինթերնեշնլ հակակոռուպցիոն կենտրոն» հ/կ-ի կողմից ներկայացրած դիմումը, թե արդյոք ՊԵԿ նախագահի բիզնես գործունեությունը պաշտոնական լիազորությունների իրականացման ընթացքում շահերի բախում չի առաջացնում, հանձնաժողովը շահերի բախում չի արձանագրել:
Այսօր «Վարկած» ակումբում h/կ-ի ներկայացուցիչ Հերիքնազ Տիգրանյանն ասաց, որ
Կարդացեք նաև
սպասում էին այն պատասխանին, ինչը ստացան. «Հանձնաժողովը կատարել է որոշակի հետաքննական աշխատանք, բայց թե այն որքանով է տալիս այն արդյունքը, որը կարող է գոհացնել հանրության լայն շրջանակներին, հեռու է բավարար լինելուց:
Հանձնաժողովը, մեր օրենսդրությամբ վերլուծություն կատարելով, արձանագրել է, որ հորաքրոջ զավակները չեն դիտվում փոխկապակցված անձինք: Իսկ մեր կողմից հիշատակված «Գալաքսի» հացի գործարանի, Ամասիայի կաթի գործարանի, «Գալաքսի» սուպերմարկետի վերաբերյալ հանձնաժողովն արձանագրել է, որ գոյություն չունեն: Սրանք փաստաթղթային առումով գոյություն չունեն: Օրինակ «Ալյանս տերմինալ» ընկերությունն էլ գոյություն չունի, բայց հանձնաժողովն իր նույն եզրակացության մեջ նշել է, որ «Ալյանստրանսը» վերաձեւակերպվել է «Տրանսալյանս» ՍՊԸ-ի, այս առումով դիմումի քննությունը կարճվել է»:
Հ. Տիգրանյանի խոսքերով, հանձնաժողովը, եթե ուսումնասիրություններ կատարեր, թե օրինակ իրենց նշած «Ապէէրոն» ու «Մեգամոթորս» ընկերությունները, որոնք խոշոր հարկատուներ են, արդյոք հարկային արտոնություններ չե՞ն ստացել կամ ի՞նչ մաքսային ռեժիմով են ապրանքներ ներմուծում կամ արդյոք ընդգրկվա՞ծ են ստուգումների ստուգաթերթում, ապա. «Եթե պարզվի, որ երբեւէ որեւէ ստուգման չեն ենթարկվել, դա կնշանակի, ինչ-որ տեղ օգտագործվել է ՊԵԿ նախագահի պաշտոնական լիազորությունը»:
Արփինե ՍԻՄՈՆՅԱՆ
