Թմրամիջոցների և թմրամոլության եվրոպական մոնիտորինգի կենտրոնի ղեկավար Վոլֆգանգ Գոցի հրավերով սույն թ. մայիսի 21-23-ը Պորտուգալիայի մայրաքաղաք Լիսաբոնում կգտնվի Ազգային անվտանգության խորհրդի քարտուղար, Հայաստանում թմրամոլության և թմրամիջոցների ապօրինի շրջանառության դեմ պայքարի հարցերը համակարգող միջգերատեսչական հանձնաժողովի նախագահ Արթուր Բաղդասարյանը: ԱԱԽ քարտուղարը կմասնակցի թմրամոլության և թմրամիջոցների ապօրինի շրջանառության դեմ պայքարի հարցերին նվիրված «REITOX շաբաթ» միջազգային համաժողովին, ուր ներկայացված են 42 պետությունների ներկայացուցիչներ: Վոլֆգանգ Գոցի հետ հանդիպման ժամանակ կքննարկվեն «REITOX» թմրամոլության և թմրամիջոցների եվրոպական ցանցում Հայաստանի ընդգրկման, Հայաստանում թմրամոլների վերականգնողական կենտրոնի ստեղծմանը, ինչպես նաև Հայաստանի Ազգային անվտանգության խորհրդի և թմրամիջոցների ու թմրամոլության եվրոպական մոնիտորինգի կենտրոնի միջև համագործակցության հուշագրի ստորագրմանը վերաբերող հարցեր: Նախատեսվում են նաև Արթուր Բաղդասարյանի պաշտոնական այլ հանդիպումներ երկկողմ և միջազգային ձևաչափով:
ԱԱԽ մամուլի ծառայություն
