«Կարմիր խնձոր»-ի թեման թերևս միշտ էլ մեզանում աղմկահարույց և քննադատական է հնչել: Գրեթե բոլորը լսելով այս արտահայտությունը երբեք չի ասոցացնում հենց մրգի կամ մրգի գույնի հետ: Չնայած թեմայի աղմկահարույց լինելուն նկարչուհի Աննա Մարտիրոսյանը, շատերին հայտնի Ատուտան, փորձել է ռիսկի դիմել և իր բողոքը հայտնել նկարների միջոցով: Աննան ասում է,իր բուն ասելիքն այն էր, որ «Կարմիր խնձոր»-ի թեման անձնական է, ոչ ոք իրավունք չունի քիթը մտցնել զույգերի անձնական կյանք, այս հարցը բացի զույգերից իրավունք չունի քննարկելու ոչ ոք: Մարդիկ վերջապես պետք է հասկանան, որ աղջկա կուսության հարցը շատ ներանձնական թեմա է, և դրա մեջ խորանալը ուղղակի ծիծաղելի է: Ըստ Ատուտայի՝ իր նկարներում գերակշռում են բաց տեսարանները: Կնոջը և տղամարդուն պատկերել է այդպես, որպեսզի իր բողոքը այդպես հայտնի: Նկարչուհին պատմում է, որ միշտ է ռիսկի դիմում և իր ասելիքն ասում է այնպես, որ մարդիկ, տեսնելով իր նկարները, կարողանան ձերբազատվել բարդույթներից և ուղղակի ազատ փորձեն ապրել: Քննադատություններից չի վախենում, ասում է, որ դրանք միշտ իրեն օգնել են ավելի լավ ստեղծագործել: Ցուցահանդեսի օրիգինալությունը նաև նրանում էր, որ «Վան Գոգ» արտկաֆեում հյուրերին դիմավորում էին կարմիր խնձորներով: Ինչպես ասում է Ատուտայի ընկերը` Սամվելը, ով նույնպես նկարիչ է, նման ցուցահանդես կազմակերպելը երկուսի որոշումն է եղել: Նկարների մեջ ամենինց շատ հավանել է գունային համադրումները: «Ատուտա» կեղծանվամբ աղջկան դեռ փոքրուց են դիմել: Նկարչուհին պատմում է, երբ փոքր էր, չէր կարողանում իր անունը հստակ արտաբերել և իրեն «Ատուտա» էր կոչում: Տարիների ընթացքում սկսեցին և՛ բարեկամները, և՛ ծանոթները իրեն այդպես դիմել: «Չնայած Ատուտայի աշխատանքները շատ ազատ են հայ հասարակության համար, բայց միշտ են առանձնացել, թե իրենց օրիգինալությամբ և թե կրեատիվ էլեմենտներով,- ասում է նկարչուհու ընկերուհին, երկար ժամանակ չէ, ինչ ճանաչում է նրան, բայց նրա ոճն արդեն հասցրել է սիրել,- Աննայի մեջ սիրում եմ նաև հումորի զգացումը, որը կարողանում է իր նկարներում ամփոփել: Կարծում եմ, այն ինչ պետք է ասվեր Ատուտան հստակ պատկերել է իր նկարներում, ինչպես անցած ցուցահանդեսի ժամանակ, այս անգամ էլ իր կրեատիվությունը նա չի թաքցրել»: Հիշեցնենք, որ մայիսի 19-ից սկսած «Կարմիր խնձոր» խորագրով ցուցահանդեսը դեռ մեկ շաբաթ կցուցադրվի:
Օվսաննա Սիմոնյան
