Մայիսի 20-ին «Արամ Խաչատրյան» համերգասրահում Հայաստանի պետական երիտասարդական նվագախումբը (ՀՊԵՆ) RP Musical management կազմակերպության հետ համատեղ ներկայացրեց բարեգործական համերգ՝ Գյումրու Լորդ Բայրոնի անվան թիվ 20 դպրոցին օգնելու համար։ Համերգին աջակցում էր ՀՀ-ում Մեծ Բրիտանիայի դեսպանատունը։
ՀՊԵՆ-ը (գեղարվեստական ղեկավար և գլխավոր դիրիժոր՝ Սերգեյ Սմբատյան) և բրիտանացի ջութակահար Ռաֆայել Զամբռզիսկի-Պեյնը ներկայացրին Պյոտր Իլյիչ Չայկովսկու (Իտալական կապրիչիո, օպ. 45), Ֆելիքս Մենդելսոնի (Սիմֆոնիա N 4, գհ. 90 Ա մաժոր), Վոլֆգանգ Ամադեուս Մոցարտի (Ջութակի կոնցերտ N 5 in Ա մաժոր, K 219) ստեղծագործությունները։ Համերգին որպես հրավիրյալ դիրիժոր մասնակցեց նաև Թոմաս Քարոլը։
ՀՊԵՆ-ի գեղարվեստական ղեկավար և գլխավոր դիրիժոր Սերգեյ Սմբատյանը լրագրողների հետ զրույցում տեղեկացրեց, որ երիտասարդական նվագախումբն անմիջապես արձագանքեց դպրոցին օգնելու կոչին։ Ըստ նրա՝ այն բարեգործական համերգները, որոնց մասնակցում է նվագախումբը, ունեն կոնկրետ նպատակ ու հասցեատեր. տվյալ դեպքում հասցեատերը Գյումրու Լորդ Բայրոնի անվան դպրոցն է։ Սերգեյ Սմբատյանը նաև ավելացրեց, որ շատ հաճելի է հրաշալի երաժիշտներ Ռաֆայել Զամբռզիսկի-Պեյնի և Թոմաս Քարոլի հետ համատեղ աշխատանքը, ինչը մեծ ձեռքբերում է երիտասարդական նվագախմբի համար։
ՀՀ-ում Միացյալ Թագավորության համատեղ դեսպան Քեթրին Ջեյն Լիչը շնորհակալություն հայտնեց ներկաներին Լորդ Բայրոնի անվան դպրոցին օգնելու համար։ Նա նշեց, որ կրթօջախը Մեծ Բրիտանիայի նվերն է գյումրեցիներին ավերիչ երկրաշարժից հետո։ Քեթրին Ջեյն Լիչը նկատեց, որ չնայած առկա դժվարություններին, դպրոցի տնօրենի և ուսուցչական կոլեկտիվի նվիրված աշխատանքի շնորհիվ դպրոցը մեծ ձեռքբերումներ ունի աշակերտների անգլերենի ուսուցման գործում։ Նա վստահություն հայտնեց, որ միասնական ջանքերով կկարողանան լուծել կրթօջախի խնդիրները և ապահովել դպրոցի ապագա գործունեությունը։
Կարդացեք նաև
Գյումրու Լորդ Բայրոնի անվան թիվ 20 դպրոցի տնօրեն Գրիգոր Հարությունյանը տեղեկացրեց, որ այսօր իրենք կարիք ունի կենտրոնացված ջեռուցման համակարգի ներդրման։ Այն ձմռանը տաքացվում է էլեկտրական սալիկներով, ինչն արդյունավետ չէ։ Տնօրենը նաև ընդգծեց, որ անգամ այդ դժվարին պայմաններում դպրոցը տալիս է շատ լավ շրջանավարտներ, իրենց աշակերտները հաղթում են հանրապետական և միջազգային օլիմպիադաներում։ Նա անձամբ իր, ուսուցչական կոլեկտիվի և 435 աշակերտների անունից շնորհակալություն հայտնեց բոլոր այն մարդկանց ու կազմակերպություններին, որոնք օգնության ձեռք են մեկնել։
Տեղեկացնենք, որ Գյումրու Լորդ Բայրոնի անվան թիվ 20 դպրոցի բացման արարողությանը 1990թ. հունիսի 10-ին ներկա է եղել Մեծ Բրիտանիայի վարչապետ Մարգարետ Թետչերը։
«Արամ Խաչատրյան» համերգասրահում Հայաստանի պետական երիտասարդական նվագախումբ
