Կարկուտից տուժած 46 գյուղերի բնակիչների բերքի 40-100 տոկոսը ռեալ տուժել է
Այսօր Արմավիրի մարզ տանող հիմնական ճանապարհը փակած 6 գյուղերի բնակիչներին, որոնց բերքը, ի թիվս 40 այլ գյուղերի, տուժել էր օրերս տեղացած ուժեղ կարկտահարությունից, գյուղնախարար Սերգո Կարապետյան ու ՀՀ փոխվարչապետ Արմեն Գեւորգյանը հորդորել են սպասել մինչեւ առաջիկա օրերին վնասների իրական չափն իրենք կներկայացնեն ՀՀ նախագահին եւ վարչապետին: Փոխվարչապետն ու գյուղնախարարը ընդառաջ էին գնացել արդեն որերորդ անգամ բողոքի ակցիա կազմակերպած եւ ճանապարհները փակած արմավիրցիներին, քանի որ վերջիններս, չհավատալով կառավարության` գյուղացուն օգնելու խոստումներին, որոշել էին ոտքով շարժվել դեպի մայրաքաղաք` ակցիան նախագահականի առաջ շարունակելու մտադրությամբ:
Aravot.am-ի հարցին, թե գյուղնախարարն ու փոխվարչապետը ի՞նչ պայմանավորվեցին արմավիրցիների հետ, Արմավիրի մարզպետի օգնական Նվեր Պետրոսյանն ասաց. «Գյուղացիների հետ համաձայնության եկան, որ ամբողջական պատկերը պարոն Գեւորգյանը կներկայացնի վարչապետին եւ հանրապետության նախագահին, այսօր կառավարության ծրագիրն էր քննարկվում Ազգային ժողովում, այսօր դա հնարավոր չէր: Հանձնաժողովները կազմվել են, վնասների չափն արդեն ուղարկել ենք: Ժողովրդի հետ պայմանավորվել են, որ ամենաուշը մինչեւ հինգշաբթի կհայտարարեն՝ օգնության տեսքով կլինի, փոխհատուցման, չեմ կարող ասել»:
Մեր հարցին, թե սա նորություն չէր, որ վնասների չափը պետք է ներկայացնեին, դրա մասին արդեն տեղեկացված էին գյուղացիները, ի՞նչն էր նրանց ստիպել, որ ակցիա անեին կրկին, պարոն Պետրոսյանն ասաց.«Այդ քանի օրը մինչեւ հանձնաժողովներն աշխատեցին, թե ինչ մշակաբույսից ինչքան կորուստ է եղել եւ այլն, գյուղացիները ոնց որ չէին համբերում: 46 համայնք է, այդ տեղեկատվությունը հավաքելու համար ժամանակ էր պետք: Արդեն ամեն ինչ պարզ է, եւ այն կներկայացվի առաջիկա օրերին»:
Կարդացեք նաև
Թե կարկտահարությունից ընդհանուր առմամբ որքանի վնաս են կրել 46 գյուղերի բնակիչները, պարոն Պետրոսյանը կոնկրետ թիվ չնշեց, միայն ասաց, որ բերքի 40-100 տոկոսը տուժել է:
Լուսինե ԲՈՒԴԱՂՅԱՆ
Լուսանկարը` Ա1+ ից
